Նոր մարզչի անունը հայտնի է․ Ջոն վան’ տ Սխիպն այլևս չի գլխավորի Հայաստանի ազգային հավաքականը
Հայաստանի ազգային հավաքականի գլխավոր մարզիչ Ջոն վան’ տ Սխիպ այլևս թիմի ղեկին չէ։ Հայաստանի ֆուտբոլի ֆեդերացիան հայտարարեց՝ կողմերը փոխադարձ համաձայնությամբ որոշել են ավարտել համագործակցությունը։ Ֆեդերացիան նաև հայտարարել է նոր գլխավոր մարզչի անունը։ Մեր ընտրանին կմարզի «Փյունիկի» նախկին գլխավոր մարզիչ Եղիշե Մելիքյանը։
Չնայած Ջոն վան’ տ Սխիպի՝ որպես գլխավոր մարզչի Հայաստանի հավաքականում անցկացրած շրջանը երկար չէր, ֆեդերացիան երախտագիտությամբ է խոսում նրա կատարած աշխատանքի մասին՝ ընդգծելով մասնագիտական մոտեցումը և նվիրվածությունը։ ՀՖՖ-ն վստահ է, որ այս շրջանը հիմք կարող է դառնալ ապագա հաջողությունների համար։
Ֆեդերացիան նշում է, որ 2026 թվականի ընտրական փուլի համար որոշվել է նոր ուղի ընտրել՝ այս անգամ վստահելով տեղական մարզչական շտաբին։
Ինքը՝ Վան’ տ Սխիպը, իր հրաժեշտի խոսքում հայտնել է, որ ցանկություն ուներ շարունակելու աշխատանքը, սակայն հարգում է ֆեդերացիայի որոշումը։ Հիշեցնենք, որ նիդեռլանդցին գլխավոր մարզչի պաշտոնում նշանակվել էր 2023 թվականի ամռանը։ Նրա օրոք թիմը 4 հանդիպումից հետո 3 պարտություն և 1 ոչ-ոքի էր գրանցել։
Առաջիկայում սկսվում է Աշխարհի 2026 թվականի առաջնության որակավորման փուլը։ Հայաստանի հավաքականի մրցակցիներն են Պորտուգալիան, Հունգարիան և Իռլանդիան։ Հավաքականի առաջիկա հանդիպումը սեպտեմբերի 6-ին է Պորտուգալիայի դեմ։ 3 օր անց մեր ընտրանին կհյուրընկալի Իռլանդիայի հավաքականին։