Հայաստանը ծանր պարտությունը կրեց Պորտուգալիայի հավաքականից

Աշխարհի 2026 թվականի առաջնության եվրոպական գոտու ընտրական փուլի Պորտուգալիա – Հայաստան հանդիպումն ավարտվեց Հայաստանի հավաքականի ծանր պարտությամբ՝ 9-1 հաշվով։

Հայաստանի միակ գոլը խփեց թիմի ավագ Էդուարդ Սպերցյանը՝ խաղի 18-րդ րոպեին։

Պորտուգալիայի հավաքականում հեթ-տրիկի հեղինակ դարձան Ժոաու Նեվեշը և Բրունու Ֆերնանդեշը, իսկ Ռենատու Վեյգան, Գոնսալու Ռամուշը և Ֆրանսիշկու Կոնսեյսաոուն աչքի ընկան մեկական գոլով։

Հանդիպումը տեղի ունեցավ Պորտուի «Դրագաու» մարզադաշտում և ընդգրկված էր ընտրական փուլի F խմբի վերջին՝ 6-րդ տուրի շրջանակում։

Նշենք, որ սեպտեմբերի 6-ին Երևանում կայացած առաջին հանդիպումն ավարտվել էր Պորտուգալիայի հաղթանակով՝ 5-0 հաշվով։

Պորտուգալիայի ընտրանին F խմբում հավաքեց 13 միավոր և ուղիղ ուղեգիր ստացավ 2026 թվականի աշխարհի առաջնություն։ Հայաստանի հավաքականը 3 միավորով եզրափակեց խումբը։