ՀՀ կառավարությունն աջակցություն է ցուցաբերելու «Հայասաթ 2» արբանյակի ստեղծմանը
Հայրենական «Հայասաթ 2» արբանյակի ստեղծման համար ՀՀ կառավարությունը պատրաստ է աջակցություն ցուցաբերել՝ մասնավորապես հարկային արտոնությունների ձևով։ Այս մասին մամուլի ասուլիսի ժամանակ հայտարարեց ՀՀ բարձր տեխնոլոգիական արդյունաբերության նախարար Մխիթար Հայրապետյանը:
Նախարարի խոսքով՝ «Հայասաթ-1»-ը, որը լաբորատորիայում է հավաքվել, հաջողությամբ դուրս է բերվել ուղեծիր 2023 թվականի դեկտեմբերին, մոտ 550 կմ բարձրության վրա, 5 տարվա ծառայության ժամկետով, սակայն առաքելությունն ավարտվել է 2025 թվականի ապրիլին։
Մխիթար Հայրապետյանը ընդգծեց, որ «Հայասաթ» տեսակի արբանյակներն անգնահատելի նշանակություն ունեն Հայաստանի համար՝ հատկապես գիտության, հետազոտության և նորարարության ոլորտում, ինչպես նաև սեփական ուժերով արբանյակ նախագծելու և գործարկելու հնարավորության տեսանկյունից։ Նախարարն ասաց, որ ոլորտը դեռ զարգացման երկար ճանապարհ ունի անցնելու՝ ավելի մեծ ու համապարփակ նպատակներ ունենալու համար։
Առաջիկայում, համագործակցելով «Բազունքի» գործընկերների հետ, մենք նախատեսում ենք նոր արբանյակ ստեղծել, որը կխթանի մեր տեխնոլոգիական և գիտական ներուժը: Կառավարությունը աջակցելու է նախագծին՝ հարկային արտոնությունների և այլ միջոցներով
Հիշեցնենք, որ «Հայասաթ-1»-ը Հայաստանի առաջին հայրենական արբանյակն էր, իսկ 2022 թվականին գործարկված «ArmSat»-ը արտադրվել էր Իսպանիայում՝ ՀՀ կառավարության պատվերով։
