Անհայտ անձինք վնասել են պատգամավոր Գառնիկ Դանիելյանի մեքենան
Ազգային ժողովի «Հայաստան» խմբակցության պատգամավոր Գառնիկ Դանիելյանը հայտնել է, որ վնասել են իրեն պատկանող ավտոմեքենան։ Նրա խոսքով՝ կոտրվել են մեքենայի կողապակին և երկու հայելիները։
Քիչ առաջ հայտնաբերեցի, որ կոտրել են մեքենայիս կողապակին և հայելիները։ Նախնական զննությամբ՝ գողություն չի կատարվել։ Այս արարքի նպատակների մասին այս պահին միայն կարող եմ ենթադրություններ անել։ Տեղի ունեցածի մասին տեղեկացրել եմ իրավապահ մարմիններին։ Ակնկալում եմ արագ արձագանք և մեղավորների անհապաղ հայտնաբերում,- գրել է Դանիելյանը։
Լրագրողների հետ զրույցում Դանիելյանը հավելել է, որ միջադեպը, իր կարծիքով, կապ ունի քաղաքական գործունեության հետ և ունի հստակ քաղաքական ենթատեքստ։
Սա առաջին դեպքը չէ, երբ Դանիելյանի ավտոմեքենան դառնում է թիրախ։ Փետրվարի 1-ին ևս նրա մեքենան փորձել էին թալանել, ապա այրել։
Այդ դեպքը ևս չի բացահայտվել։