Աբովյանում երիտասարդների միջև վեճը ավարտվել է դանակահարությամբ․ երկու հոգի տեղափոխվել են բժշկական կենտրոն
Հուլիսի 26-ին Կոտայքի մարզի Աբովյան քաղաքում՝ «Հայփոստի» վարչական շենքի հարևանությամբ, ծագած վիճաբանությունը ավարտվել է դանակահարությամբ։ Ըստ իրավապահների նախնական տեղեկությունների՝ միջադեպի հետևանքով երկու երիտասարդ՝ 16-ամյա Մհեր Մ.-ն և 19-ամյա Պողոս Պ.-ն, մարմնական վնասվածքներով տեղափոխվել են Աբովյանի բժշկական կենտրոն։ Մեկի մոտ ախտորոշվել են կրծքավանդակի հատվածի կտրած-ծակած վերքեր, մյուսի մոտ՝ ազդրի վնասվածք։
Իրավապահները պարզել են, որ միջադեպին ներգրավված են եղել Արարատի և Կոտայքի մարզերի բնակիչներ։ Վիրավորները և նրանց ընկերը՝ 18-ամյա Նարեկ Ա.-ն, Արարատի մարզից են։ Դանակահարության մյուս մասնակիցները Նոր Գեղի գյուղի բնակիչներ՝ 25-ամյա Գոռ Բ.-ն և նրա 20-ամյա եղբայրը՝ Գարիկ Բ.-ն են։
Ըստ նախնական տվյալների՝ հենց Գարիկ Բ.-ն է դանակահարել Մհերին ու Պողոսին՝ օգտագործելով իր մոտ եղած սուր-կտրող առարկա։ Դեպքից հետո կասկածյալը մի քանի ժամ անց ինքնակամ ներկայացել է ոստիկանություն, որտեղից նրան տեղափոխել են Հայաստանի Քննչական կոմիտեի Կոտայքի մարզային քննչական վարչություն։ Այս պահին միջադեպի փաստով հարուցվել է քրեական վարույթ, ընթանում է նախաքննություն։
Ոստիկանությունը մանրամասնում է, որ երկու կողմերի միջև ծագած կոնֆլիկտը չի եղել պատահական․ երիտասարդների միջև որոշ տարաձայնություններ եղել են ավելի վաղ, որոնք, ցավոք, չեն մարվել, այլ վերածվել են վտանգավոր ընդհարման։