Արմավիրում արձանագրվել է սննդային թունավորման դեպք
Արմավիրի մարզում այսօր՝ սեպտեմբերի 8-ին, սննդային թունավորման մի քանի դեպք է գրանցվել՝ կապված «Արմավիր Գարդեն» հանրային սննդի կետի հետ։ ՀՀ սննդամթերքի անվտանգության տեսչական մարմնի Արմավիրի մարզային կենտրոնը ահազանգ է ստացել, որ բժշկական կենտրոն են ընդունվել երկու քաղաքացիներ՝ «սննդային թունավորում» ախտորոշմամբ։
Թեստերի և հիվանդների հարցումների արդյունքում պարզվել է, որ քաղաքացիները վատ են զգացել իրենց սնկապուր ուտելուց հետո։ Ավելի ուշ պարզվել է, որ բժշկական օգնության է դիմել ևս 10 քաղաքացի, որոնք նույն օբյեկտում կերել են հավի թևիկներ, հավով աղցան և հավով պիցցա։
Սննդամթերքի անվտանգության տեսչական մարմինը անմիջապես ձեռնարկել է վերահսկողական միջոցառումներ։ Օբյեկտից սննդամթերքի նմուշառումներ են վերցվել և ուղարկվել լաբորատոր փորձաքննության, որպեսզի պարզվի սննդային թունավորման պատճառը։