Հեղինակ: Սամվել Մխիթարյան

Ադրբեջանը շարունակում է ակտիվորեն առաջ տանել «Միջին միջանցքի» իր տեսլականը՝ ներառելով նաև Հայաստանի տարածքը։ Նյու Յորքում ելույթ ունենալով՝ Ադրբեջանի նախագահի օգնական Հիքմեթ Հաջիևը բացահայտ խոսեց այն մասին, թե ինչպես են իրենք տեսնում Հարավային Կովկասի ապագան։ Նրա խոսքերում կան մի քանի կարևոր կետեր, որոնք Հայաստանի համար պետք է ահազանգ լինեն։

Վերջին շրջանում խաղաղության պայմանագրի շուրջ բանակցությունները կանգ են առել մի կարևոր կետում՝ Ադրբեջանը պահանջում է, որ Հայաստանը փոփոխություններ կատարի իր Սահմանադրությունում։ Մասնավորապես, նրանց պահանջն է, որ Հայաստանի Սահմանադրության նախաբանից հեռացվեն Անկախության հռչակագրին վերաբերող այն հղումները, որոնք Ադրբեջանը համարում է «տարածքային պահանջներ»։ Բաքուն այս պահանջը արդարացնելու համար օգտագործում է Հունաստանի և Հյուսիսային Մակեդոնիայի միջև կնքված Պրեսպայի համաձայնագրի օրինակը։ Սակայն, եթե ուշադիր նայենք, ակնհայտ է, որ այս երկու դեպքերը տարբերվում են իրարից՝ ինչպես գիշերն ու ցերեկը։