Իտալիայում տեղի կունենա միջազգային համաժողով՝ նվիրված Արցախին

Նոյեմբերի 18-19-ը Հռոմում տեղի կունենա միջազգային համաժողով՝ նվիրված Արցախի մշակութային ժառանգության պահպանությանը։ Այն ունի «Սրբազան հողեր, ընդհանուր տեսլական» խորագիրը («Sacred Grounds, Shared Vision»)։ Համաժողովը տեղի կունենա Սուրբ Թոմաս Աքվինասի Հայրապետական ​​համալսարանում։ Հնարավոր կլինի հետևել նաև օնլայն տարբերակով։

Համաժողովին նախատեսվում են ինչպես առանձին բանախոսություններ, այնպես էլ կլոր սեղան քննարկումներ։ Ելույթ կունենան հայ և եվրոպացի մի շարք մասնագետներ։ Հռոմի Լա Սապիենզա համալսարանից Մարկո Բայսը կներկայացնի «Կովկասյան Ալբանիայի վերաբերյալ դասական և միջնադարյան աղբյուրների օգտագործումն ու չարաշահումը» թեման, Համբուրգի համալսարանից կովկասագետ Յոստ Գիպերտը հանդես կգա «Կա՞ն արդյոք Արցախում ալբանական արձանագրություններ» թեման։ Յենայի համալսարանից Պլոնտկե-Լյունինգը կներկայացնի «Արցախի ճարտարապետական ​​ժառանգության պատմական ակնարկը», իսկ Երևանի պետական ​​համալսարանը ներկայացնող Համլետ Պետրոսյանը՝ «Արցախի հուշարձանների ներկա իրավիճակը» թեման։ Վերջում արդեն տեղի կունենա կլոր սեղան եզրափակիչ քննարկում։

Համագումարը կազմակերպվում է Սուրբ Աթոռում Հայ Առաքելական Եկեղեցու ներկայացուցչության և Անգելիկումի էկումենիկ հետազոտությունների ինստիտուտի կողմից՝ Ամենայն Հայոց Կաթողիկոսության հովանավորությամբ: