Ծաղկի սրահի շենքում կառուցված Վանաձորի տիկնիկային թատրոնը հիմնանորոգվել է
Վանաձորի տիկնիկային թատրոնը հիմնադրվել է 1992 թվականին՝ սովետական շրջանի ծաղկի սրահի շենքում։ Թատրոնը վերանորոգվել է և այսօր արդեն ունի թատրոնի տեսք։
Ըստ թատրոնի տնօրեն Սևակ Սարգսյանի՝ շենքը տիպային թատրոնի շենք չի եղել և թատերական պահանջներին չի համապատասխանել։
Նախկինում շենքը չուներ ոչ մի բեմական ենթակառուցվածքներ, հանդերձարաններ չկային, սանհանգույցները նորմալ վիճակում չէին, այսինքն շատ քիչ էր եղածը, իսկ այս վերակառուցման արդյունքում մենք ամբողջությամբ նոր, ժամանակակից պահանջներին համապատասխան թատրոնի շենք ենք ունեցել՝ ավելի գեղեցիկ դահլիճով, դերասանների համար առանձին հանդերձարաններ, պահեստային հատվածներ, տեխնիկական հատվածներ, ամբողջությամբ նոր և լիարժեք աշխատանքային պայմաններ են ստեղծվել։
1994 թվականին եղել է առաջին ներկայացումը, սակայն միայն վերջերս՝ հիմնանորոգումից հետո արդեն ունի թատրոնի տեսք։ 30 տարիների ընթացքում որոշակի բարելավումներ և շտկումներ եղել են։ Գլխավոր խնդիրներից մեկն էլ ջեռուցման բացակայությունն էր։ Շենքը այժմ հագեցած է ջեռուցման համակարգով։
Թատրոնը ստեղծագործական ակտիվ գործունեություն է ծավալում։ Վերջին տարիներին մասնակցում է ԿԳՄՍ նախարարության կողմից հայտարարվող դրամաշնորհային ծրագրերին, որով հնարավորություն է ունեցել ստեղծելու նոր ներկայացումներ։ Թատրոնը նաև ներառված է աբոնեմենտային ծրագրում, որով աշխատում է հանրակրթական դպրոցների հետ։
Տնօրենի խոսքով՝ խաղացանկում կան ավելի քան 7 ներկայացումներ, որոնք ցուցադրում ենք տարբեր տարիքի երեխաների համար։
Ուրախությամբ ասեմ, որ 2021 թվականին արդեն առաջին անգամ և երեկ երկրորդ ներկայացման պրեմիերան ունեցանք։ Այդպես մենք փորձ արեցինք պլանշետային կամ հատակային տիկնիկներով ներկայացում ունենալու մեր խաղացանկում, որովհետեւ մինչ այդ միայն ձողիկավոր և ավանդական տիկնիկներն էր օգտագործվում։
Թատրոնում երեկ տեղի ունեցավ «Չիպոլինոյի արկածները» պիեսի պրեմիերան՝ բեմադրված հատակային տիկնիկներով։
Դատելով շինարարության ընթացքում ձևավորված հետաքրքրությունից՝ թատրոնի տնօրենը վստահ է՝ այցելուների աճը էականորեն կավելանա։
Վանաձորի տիկնիկային թատրոնի տեսքը հիմա և նախկինում (լուսանկարը՝ թատրոնի ֆեյսբուքյան էջից)
Շուշան Ասրյան