Բազում գյուղում կառուցվել են սառնարաններ
Փամբակ համայնքի Բազում բնակավայրում շահագործման է հանձնվում սառնարանային տնտեսությունը։ Այսուհետ բնակիչները հնարավորություն կունենան պահեստավորել տարվա ընթացքում ստացված բերքը` խուսափելով կորստի վտանգից։ Սառնարանային տնտեսությունը ծառայելու է ինչպես Բազում, այնպես էլ՝ հարակից մյուս բնակավայրերին։
Բազում համայնքի վարչական ղեկավար Արթուր Ծատրյանի խոսքով՝ աառնարանները անցնում են 3 փուլով՝ կառուցման, ուսումնական և շահագործման։ Ներկայումս ավարտվել է կառուցման փուլը։ Տեղի բնակիչները և կոոպերատիվի անդամներն էլ շուտով կսովորեն աշխատել սառնարանների հետ։ Գարնանը արդեն նախատեսվում է սկսել շահագործումը։
Սառնարանները 30 քմ տարածք են զբաղեցնում։ Մինչև փետրվարի 6-ը ունենալու ենք դասընթացներ, որոնց ընթացքում արդեն սովորելու ենք սառնարանը օգտագործելու ձևերը։ Կոոպերատիվը ստեղծվել է կոնկրետ գյուղի բերքը պահեստավորելու համար, այսինքն՝ բնակիչների համար, բնականաբար, էժան կլինի, իսկ կողքից արդեն, երբ որ վարձակալության տրվի գումարային տարբերություն կլինի։ Սրանք դեռևս հստակցված չեն։ Համենայնդեպս, մենք այդպես ենք ծրագրել անել, — նշեց վարչական ղեկավարը։
Վարչական ղեկավարի խոսքով՝ բնակիչները իրենց ապրանքները փոքր քանակությամբ տանում են Վանաձոր, կամ էլ տալիս են «Վան ֆուդ» պահածոների գործարանին։ Այս ամենը համակարգելու համար էլ ստեղծվել է սառնարանային ծրագիրը։
Մենք բնակիչներից կգնենք ու կվերավաճառենք մեր պահածոների գործարանին։ Արդյունքում՝ բնակիչը հավելյալ տրանսպորտային ծախսերն է կրճատում և ժամանակը։ Կոնկրետ մեր բնակավայրում խնձորի, տանձի, կեռասի, սալորի շատ մեծ քանակ կա։ Մեր բնակիչները ունեն արդեն բերքը պահեստավորելու տեղ, այսինքն՝ բերքի կորստի վտանգ չկա։ Մինչև ծրագիրը ներկայացնելը՝ մենք խոսել ենք տեղի բնակիչների հետ, թե ով ինչ բերք է ստանում, որ արդյունավետ օգտագործենք հողերը։ Արդյունքում՝ «Շեն» բարեգործական հիմնադրամից բնակիչներին տվել են տարբեր բանջարաբոստանային մշակաբույսերի սածիլներ, — ասաց Արթուր Ծատրյանը։
Ծրագիրը իրականացվել է «Շեն» բարեգործական հիմնադրամի և «Բազում վիտամիններ» գյուղատնտեսական կոպերատիվի համաֆինանսավորմամբ։