Հայաստանում շրջհարկ վճարողների համար անցումային շրջան սահմանվեց

Կառավարությունը ժամանակավոր հետքայլ կանի առևտրով զբաղվողների շրջանառության հարկի բարձրացման հարցում։ Այս տարվա առաջին կեսին 5 տոկոսից ավելի վճարվելիք հարկը հետ կվերադարձնեն բիզնեսներին:

Այս հարցը մեկ օրինակն է նաև նրա, որ մենք որոշակի փոփոխություններ ենք անում մեր մասնավոր հատվածի գործընկերների հետ շփումների արդյունքում: Վերջին շրջանում բավականին ակտիվ հանդիպումներ ենք ունեցել և հանգել ենք այս որոշմանը: 2025 թվականի հունվարի մեկից փոփոխություններ են կատարվել շրջանառության հարկի համակարգում: Նպատակը եղել է շրջանառության հարկ վճարողների կողմից վաճառքի նպատակով կատարված ձեռքբերումները և այլ ծախսերը պատշաճ փաստաթղթավորելու տնտեսական շարժառիթներ ձևավորելը, հետևաբար նաև ստվերային շրջանառությունները կրճատելը, — նշել էր Գևորգ Պապոյանը։

Իսկ թե ինչ շփումների մասին է խոսքը, ականատես էինք եղել մի քանի անգամ։ Կառավարությունը հունվարից շեշտակի բարձրացրել էր շրջանառության հարկը՝ 5 տոկոսից հասցնելով 10 տոկոսի։ Սրա նպատակը, ըստ կառավարության, խոշոր բիզնեսի ստվերները կրճատելն ու փոքր բիզնեսներին առաջ մղելն է։ Սակայն հենց տնտեսվարողներն էլ ցույցեր էին կազմակերպել, նշելով, որ նոր օրենքի ընդունման դեպքում մի շարք փոքր և խոշոր բիզնեսներ կփակվեն։ Վիճակագրական կոմիտեի տվյալներով Հայաստանում շուրջ 110 հազար ձեռնարկատիրություններ կան։

Հասարակության ճնշումների տակ Կառավարությունը որոշել է իրականացնել աջակցության ծրագիր այն տնտեսվարողների համար, որոնք 2025 թվականի հունվարի 1-ի դրությամբ ունեցել են նախկինում ձեռք բերած ապրանքային զգալի մնացորդներ, որոնց համար կա՛մ չունեն ձեռքբերումը հիմնավորող փաստաթղթեր, կա՛մ ունեն փաստաթղթեր, սակայն դրանց գծով մինչև 2025 թվականի հունվարի 1-ը շրջանառության հարկը նվազեցվել է ընդամենը 4 տոկոսի չափով` ներկայիս 9.5 տոկոսի փոխարեն։

Մեր սահմանած անցումային շրջանը կներառի 2025 թ. առաջին 6 ամիսը` մինչև հուլիսի 1։ Այս ընթացքում կառավարությունը կաջակցի, որպեսզի շրջանառության հարկ վճարող տնտեսվարողները կարողանան հարկային ցածր բեռի սահմաններում իրացնել նախկինում` առանց փաստաթղթերի ձեռք բերած ապրանքային մնացորդները: