Հայաստանում կարող են ներդրվել կրիպտոարժույթներով վճարման մեխանիզմներ
Հայաստանի կենտրոնական բանկը նախատեսում է ներդնել կրիպտոարժույթներով վճարումների ենթակառուցվածք, սակայն՝ ազգային արժույթի ավտոմատ փոխարկմամբ։ Այս մասին «Doing Digital» համաժողովի ընթացքում հայտարարել է ԿԲ փոխնախագահ Արմեն Նուրբեկյանը։
Նրա խոսքով, բիթքոինը հազիվ թե կիրառելի լինի որպես վճարման միջոց՝ իր փոխարժեքի տատանումների պատճառով, սակայն հնարավոր է ստեղծել կրիպտոակտիվներով վճարման հնարավորություն՝ արտարժութային քարտերի սկզբունքով։ Նուրբեկյանը նշել է, որ ինչպես դոլարային քարտերը ավտոմատ փոխարկում են վճարումները դրամի, նույնը հնարավոր է իրականացնել կրիպտոարժույթներով վիրտուալ քարտերի դեպքում։
ԿԲ-ն նաև քննարկում է ստեյբլքոինների կարգավորման իրավական դաշտի ստեղծումը։ Նուրբեկյանը հայտնել է, որ հնարավոր է նման արժույթներին կցված բանկային քարտերի թողարկում, օրինակ՝ ArCa համակարգի միջոցով։
ԿԲ նախագահ Մարտին Գալստյանը նշել է, որ բիթքոինի կիրառումը որպես վճարամիջոց կարող է առաջացնել նույն խնդիրները, որոնք հնում առկա էին ոսկու հետ. գնի աճի դեպքում տնտեսվարողները խուսափում էին այն ծախսելուց, իսկ անկման դեպքում՝ խնայողությունները կորցնում էին արժեքը։
Խնայողությունները կրիպտոարժույթով պահելու փորձերը առավել տարածված են բարձր գնաճ ունեցող երկրներում, օրինակ՝ Արգենտինայում, Վենեսուելայում և Թուրքիայում։ Նուրբեկյանը նշել է, որ Հայաստանում դոլարիզացիայի մակարդակը վերջին տարիներին նվազել է՝ հասնելով 30%-ի՝ նախկին 80%-ի փոխարեն, ինչը վկայում է դրամի նկատմամբ վստահության աճի մասին։
Հայաստանում կրիպտոարժույթը կարող է կիրառվել նաև որպես դրամական փոխանցումների արագ միջոց, ինչը արդիական է շատ զարգացող երկրների համար։ Սակայն Նուրբեկյանը շեշտել է, որ փոքր պետությունների համար խնայողությունները կրիպտոարժույթներով պահելը կարող է ռիսկեր պարունակել, քանի որ դրանք պահանջում են մեծ ֆինանսական պահուստներ։
ԿԲ-ն առաջիկայում Ազգային ժողով կներկայացնի կրիպտոարժույթների կարգավորման մասին օրենքի նախագիծը, որը սահմանելու է նույնականացման պահանջներ՝ առուվաճառքի մասնակիցների համար։ Օրենքն ընդունվելուց հետո կրիպտոարժույթների փոխանակման կետերն ու թրեյդերները պետք է համապատասխանեն նոր կանոնակարգերին և ստանան հավատարմագրում։