Խափանումներ «Զվարթնոցում». մի քանի չվերթ չեղարկվել է, տասնյակ ուղևորներ սպասում են

Երևանի «Զվարթնոց» միջազգային օդանավակայանում այսօր նկատվել է չվերթների խիստ խախտում․ միանգամից մի քանի թռիչքներ չեղարկվել կամ հետաձգվել են։ Խնդիրն առնչվում է ոչ միայն ռուսական «Աերոֆլոտ» ընկերությանը, այլև այլ միջազգային փոխադրողների։

Մասնավորապես, չեղարկվել են Երևանից դեպի Մոսկվա («Աերոֆլոտ») և Կահիրե («Air Cairo») ուղղություններով թռիչքները։ Վերադարձող չվերթները նույնպես խնդիրների են բախվել․ Մոսկվայից, Քյոլնից և Կահիրեից Երևան նախատեսված թռիչքները ևս չեն իրականացվել։

Բացի չեղարկումներից, մի շարք չվերթներ էլ ժամանում են ուշացումով՝ հատկապես Մոսկվայից, Սանկտ Պետերբուրգից, Հուրգադայից, Եկատերինբուրգից և Նովոսիբիրսկից։

Ամենախոշոր խնդիրը առաջացել է «Աերոֆլոտ» ընկերության ներսում՝ տեղեկատվական համակարգերի խափանման պատճառով։ Ընկերությունը դեռ առավոտյան զգուշացրել էր հնարավոր խափանումների մասին։ Ըստ վերջին տվյալների՝ միայն «Աերոֆլոտը» 47 չվերթ է ստիպված եղել չեղարկել։

Չեղարկված չվերթերի ուղևորներին առաջարկվում է ստանալ տոմսերի գումարը կամ վերամշակել դրանք առաջիկա 10 օրվա ընթացքում։ Միևնույն ժամանակ, Մոսկվայի «Շերեմետևո» օդանավակայանում ստեղծված հերթերից խուսափելու համար ուղևորներին հորդորում են ժամանակավորապես լքել օդանավակայանը։