Կառավարությունն ընդունեց 2026 թվականի պետական բյուջեի նախագիծը
Կառավարությունը հաստատեց 2026 թվականի պետական բյուջեի նախագիծը։ Բյուջեի ընդունումը տեղի ունեցավ առանց վարչապետ Նիկոլ Փաշինյանի մասնակցության, քանի որ նա Մոսկվայում էր։ Նիստը վարում էր փոխվարչապետ Տիգրան Խաչատրյանը։
Եկեք միասին հասկանանք, թե ինչ է թաքնված թվերի հետևում։ Ֆինանսների նախարարը հայտարարեց մի քանի կարևոր կանխատեսումներ։ 2026-ին ակնկալվում է, որ Հայաստանի տնտեսությունը կաճի 5.4 տոկոսով։ Սա մի փոքր ավելի բարձր է, քան այս տարվա կանխատեսված 5.1 տոկոսը։ Պետական բյուջեի եկամուտները նախատեսվում են 3 տրլն 91 մլրդ դրամ, իսկ ծախսերը՝ 3 տրլն 628 մլրդ դրամ։ Սա նշանակում է, որ պետությունը ավելի շատ գումար է ծախսելու, քան ստանալու։ Ծախսերի և եկամուտների տարբերությունը, այսպես կոչված պակասուրդը, կկազմի 537 մլրդ դրամ կամ ՀՆԱ-ի 4.5 տոկոսը։ Նախատեսվում է, որ այն հետագա տարիներին կնվազի մինչև 2.8 տոկոս։
Գումարները ներդրվելու են այն ոլորտներում, որոնք ուղղակիորեն բարելավում են քաղաքացիների կյանքը։ Վերջապես կներդրվի առողջապահական համապարփակ ապահովագրության համակարգը։ Շարունակվելու է Լեռնային Ղարաբաղից բռնի տեղահանված անձանց սոցիալական աջակցության ծրագիրը, ներառյալ բնակարանային ապահովումը։ Դրա համար կտրամադրվի 55 մլրդ դրամ։ 2026 թվականից ամբողջ Հայաստանում կգործի «Ընտանիքների անապահովության գնահատման նոր համակարգը», որի նպատակն է հաղթահարել ծայրահեղ աղքատությունն ու նվազեցնել ընդհանուր անապահովության մակարդակը։ Բացի այդ, 9.7 մլրդ դրամ կհատկացվի անհուսալի վարկային պարտավորություններ ունեցող անձանց զբաղվածության աջակցության ծրագրին, իսկ 4.9 մլրդ դրամ կտրամադրվի Ակադեմիական քաղաքի նախագծման և կառուցման համար։
Ֆինանսների նախարարը նաև նշեց, որ սա առաջին դեպքն է, երբ բյուջեն ներկայացվում է եռամյա հեռանկարով, ինչը թույլ է տալիս ավելի լավ պլանավորել ապագա ծախսերը։ Քննարկումները կշարունակվեն Ազգային ժողովում։