Նիկոլ Փաշինյանը մասնակցել է Փարիզի միջուկային էներգիայի երկրորդ գագաթնաժողովին

Փարիզում տեղի ունեցավ Միջուկային էներգիայի երկրորդ գագաթնաժողովը, որի ընթացքում բարձր մակարդակի հյուրերին դիմավորեցին Ֆրանսիայի նախագահ Էմանուել Մակրոնը և Ատոմային էներգիայի միջազգային գործակալության (IAEA) գլխավոր տնօրեն Ռաֆայել Գրոսսը։

Միջոցառմանը մասնակցում էին նաև Եվրոպական հանձնաժողովի նախագահ Ուրսուլա ֆոն դեր Լայենը, Սլովակիայի, Խորվաթիայի վարչապետները և մի շարք այլ երկրների ղեկավարներ:

ՀՀ վարչապետ Նիկոլ Փաշինյանը հանդես է եկել ելույթով՝ նշելով, որ 2024 թվականին Բրյուսելում կայացած առաջին գագաթնաժողովից հետո այս հանդիպումը կխթանի երկրների միջև համագործակցությունը քաղաքացիական միջուկային էներգիայի ոլորտում։

Փաշինյանն ընդգծել է, որ միջուկային էներգիան՝ որպես ցածր ածխածնային և կարգավորվող էներգիայի աղբյուր, կարող է արդյունավետորեն համատեղվել վերականգնվող էներգիայի աղբյուրների հետ՝ չմրցակցելով դրանց հետ: Նա նշել է, որ Հայաստանը COP28-ում լիովին աջակցել է մինչև 2050 թվականը միջուկային էներգիայի եռապատկման հռչակագրին և գնահատել Փարիզի համաձայնագրի նպատակների առաջընթացը:

Վարչապետն անդրադարձել է նաև Հայկական Ատոմային Էլեկտրակայանի (ՀԱԷԿ) շահագործման երկարաձգման ծրագրին՝ մինչև 2036 թվականը՝ նշելով, որ այն հիմք կդառնա միջուկային նոր էներգաբլոկի անվտանգ անցման համար: Անդրադարձ է եղել նաև փոքր մոդուլային ռեակտորների (ՓՄՌ) տեխնոլոգիաներին, որոնց ուսումնասիրությունն ու միջազգային գործընկերների առաջարկների վերլուծությունը շարունակվում է:

Փաշինյանը շեշտել է նաև միջուկային ոլորտի համար որակյալ աշխատուժի կարևորությունը՝ նշելով, որ կրթական և ուսուցման ծրագրերը անհրաժեշտ են աշխատուժի ապահովման համար: Նա նշել է, որ ՀԱԷԿ-ի շահագործման ողջ ընթացքում միջուկային կամ ճառագայթային անվտանգության որևէ միջադեպ չի գրանցվել:

Փարիզի գագաթնաժողովը, ըստ Փաշինյանի, կնպաստի միջազգային համագործակցության խորացմանը և նոր նախաձեռնությունների ստեղծմանը միջուկային ոլորտում:

Մարինա Գրիգորյան