Կասեցվել է Արմավիրի մարզի «Գրեգորիան» ՍՊԸ գինու արտադրամասի գործունեությունը
Սննդամթերքի անվտանգության տեսչական մարմնի (ՍԱՏՄ) որոշմամբ կասեցվել է Արմավիրի մարզի Մերձավան գյուղում տեղակայված «Գրեգորիան» ՍՊԸ-ին պատկանող գինու արտադրամասի գործունեությունը՝ արձանագրված տեխնիկական և հիգիենիկ բազմաթիվ խախտումների պատճառով։ Տեսչական մարմնի Երևանի կենտրոնի տեսուչները հիմք են ընդունել այն փաստերը, որոնք մատնանշում են արտադրական միջավայրի անբավարար վիճակը և արտադրանքի աղտոտման բարձր ռիսկերը։
Մասնավորապես, արձանագրությամբ հաստատվել է, որ արտադրական տարածքում չի բացառվել կրծողների, միջատների կամ այլ կենդանիների ներթափանցումը, իսկ շինությունների մակերևույթները, այդ թվում՝ պատերը, բավարար չափով պաշտպանված չեն եղել կեղտի կուտակումներից։ Լուրջ թերություններ են նկատվել նաև առաստաղների վրա, որտեղ արձանագրվել են բորբոսի և կոնդենսատի առկայություն։ Գինու մզվածքի պատրաստման գործընթացն իրականացվել է բացօթյա պայմաններում, ինչը չի երաշխավորում արտադրանքի պաշտպանությունը արտաքին ազդեցություններից։
Բացի այդ, խախտումներ են հայտնաբերվել նաև գինու հասունացման սենյակում և պատրաստի արտադրանքի պահեստային հատվածում. առաստաղները եղել են վնասված, իսկ պատերը չեն համապատասխանել հիգիենայի պահանջներին (չեն եղել անջրանցիկ, լվացվող կամ ախտահանվող նյութերից)։ Խնդիրներ են արձանագրվել նաև արտադրական տարաների հետ կապված, որոնց մի մասը չի բավարարել հիգիենիկ պահանջները։ Սննդամթերքի անվտանգության տեսչական մարմինը սահմանել է հստակ ժամկետ՝ հայտնաբերված բոլոր թերությունները վերացնելու համար, ինչից հետո միայն ընկերությունը հնարավորություն կունենա վերսկսել արտադրական գործունեությունը։