ԵՊՀ-ում դադարեցվել է Ուսանողների հետ տարվող աշխատանքների կենտրոնի գործունեությունը
Երևանի պետական համալսարանում կտրուկ փոփոխություն է տեղի ունեցել, որի հետևանքները կարող են զգալի ազդեցություն ունենալ ուսանողական միջավայրի վրա։ Հուլիսի 11-ից ԵՊՀ-ում դադարեցվում է Ուսանողների հետ տարվող աշխատանքների կենտրոնի գործունեությունը։ Այս որոշման արդյունքում դադարեցվում է նաև մի շարք ուսանողական կառույցների գործունեությունը, որոնք ձևավորվել և գործել էին հենց այդ կենտրոնի հովանու ներքո։
Լուրը հաստատել է կենտրոնի արդեն նախկին տնօրեն Էդուարդ Գալստյանը՝ ֆեյսբուքյան գրառմամբ։ Նա ընդգծում է, որ լուծարման հետևանքով դադարել են Լեոնիդ Ազգալդյանի անվան մարտական պատրաստության ակումբի, Գևորգ Արշակյանի անվան գիտելիքի դպրոցի, գիտարշավական ակումբի և այլ ուսանողական նախաձեռնությունների աշխատանքները։
Մեկ օրում փաստացի չեղարկվել են բոլոր այն ծրագրերը, որոնք նախատեսված էին ուսանողների զարգացման համար։ Սա պարզապես մի քանի աշխատակցի ազատում չէ, այլ՝ ազգային արժեքների հիման վրա ձևավորված ուսանողական կյանքի թուլացում, — նշում է Գալստյանը։
Հիշեցնենք՝ այս կենտրոնի լուծարման հարցը առաջին անգամ բարձրացվել էր դեռ 2018-ի իշխանափոխությունից հետո։ Այն ժամանակ այս կառույցը քննադատության էր ենթարկվում «քաղաքականացված լինելու» կամ «համալսարանում կուսակցական կառուցվածքներ ձևավորելու» մեղադրանքներով։