Տիգրան Սիմոնյանը նշանակվել է Հայաստանի ֆիզիկական կուլտուրայի և սպորտի պետական ինստիտուտի ռեկտոր
Կառավարության հունվարի 16-ի նիստում ԿԳՄՍ նախարար Ժաննա Անդրեասյանը ներկայացրեց Հայաստանի ֆիզիկական կուլտուրայի և սպորտի պետական ինստիտուտի ռեկտորի ընտրության արդյունքները։
2024 թվականի դեկտեմբերի 10-ին կայացած մրցույթին մասնակցելու համար հայտ էր ներկայացրել միայն մեկ թեկնածու՝ մանկավարժական գիտությունների թեկնածու, դոցենտ Տիգրան Սիմոնյանը։ Նիստին մասնակցած 18 հոգաբարձուների խորհրդի անդամներից 17-ը կողմ, 1-ը՝ դեմ քվեարկել են Սիմոնյանի թեկնածությանը։ Ընտրության արդյունքների համաձայն՝ Տիգրան Սիմոնյանը հաստատվել է ինստիտուտի ռեկտորի պաշտոնում՝ 5 տարի ժամկետով։
Տիգրան Սիմոնյանը մինչ այս շուրջ մեկ տարի եղել է ռեկտորի ժամանակավոր պաշտոնակատարը։ Նա նշել է, որ հասկանում է այն պատասխանատվությունը, որն ստանձնում է փոփոխությունների այս փուլում։
Բուհը, ոլորտի պատասխանատու լինելով, նաև պատասխանատվություն է զգում՝ մասնակցելու այն աշխատանքներին, որը հաստատվել են անցած տարի Կառավարության կողմից, մասնավորապես՝ ֆիզիկական կուլտուրայի և սպորտի զարգացման ծրագրի աշխատանքներին: Հավատացեք, որ բուհն ամենայն պատասխանատվությամբ է մոտենալու այս հարցերին,- ասաց Սիմոնյանը: