Դավիթ Բեկի դպրոցը կփակվի․ ի՞նչ դիտարկումներ ունի այս մասով պատգամավոր Դավիթ Դանիելյանը

Սյունիքի մարզի Դավիթ Բեկ գյուղի դպրոցը կարող է փակվել՝ կրթական համակարգի օպտիմալացման ծրագրի շրջանակում։ Կառավարությունը նախատեսում է մի քանի գյուղերի դպրոցներ միավորել և կենտրոնացնել Արծվանիկում կառուցվող նոր, ժամանակակից դպրոցում։ Թեև ծրագիրը ներկայացվում է որպես կրթության որակի բարելավման քայլ, այն առաջացրել է Դավիթ Բեկի բնակիչների մտահոգությունը։ Բնակիչներից շատերը մտավախություն ունեն, որ դրա փակումը կհանգեցնի բնակչության արտահոսքի։ Թեմայի վերաբերյալ իր դիտարկումներով Amnews-ի հետ խոսել է «Քաղաքացիական պայմանագիր» կուսակո պատգամավոր Դավիթ Դանիելյանը։

Ո՞ր փուլում է այս պահին կառավարության այն որոշումը, ըստ որի՝ Դավիթ Բեկի դպրոցը կփակվի և այնտեղ սովորող երեխաները կրթությունը կշարունակեն Արծվանիկում։ Որոշումը վերջնական է, թե քննարկումները դեռ շարունակվում են։

Նախ դուք գիտեք, որ մոդելը հետևյալն է․ մի քանի գյուղերի դպրոցներ կփակվեն, որտեղ քիչ աշակերտներ կան։ Ուսումնական գործընթացը կկենտրոնացվի մեկ գյուղում, նորակառույց դպրոցում, որը կունենա ժամանակակից պայմաններ՝ 21-րդ դարի կրթական ոլորտին համապատասխան տվյալներ, տեխնիկական հագեցվածություն։ Մնացած գյուղերում, որտեղից երեխաները կժամանեն այդ դպրոց, նրանց կտեղափոխեն հատուկ, ժամանակակից, էլեկտրական միկրոավտոբուսները, որոնք նույնպես հագեցած կլինեն բոլոր հարմարավետ պայմաններով։

Այս պահին Արծվանիկ գյուղի դպրոցի շինարարական փուլն է, և, եթե չեմ սխալվում, մինչև 2026 թվականի հունիսը կավարտվի, բայց այս պահին և՛ Արծվանիկում, և՛ Դավիթ Բեկում երեխաները նորմալ հաճախում են իրենց հին դպրոց։

Ի՞նչ պատճառաբանություններ են ներկայացվել շենքի տեղափոխումը հիմնավորելու համար։ Ձեր կարծիքով՝ այդ պատճառներն արդյոք բավարարո՞ւմ են այդ քայլի անհրաժեշտությանը։

Թե ինչպես է դպրոցների կառավարումը լինելու, ինչպես են կողքի գյուղի երեխաները հաճախելու կենտրոնացված, բայց ժամանակակից դպրոց, ընդհանուր բովանդակության ու գաղափարի տրամաբանությունն ինձ համար ընկալելի է։ Բայց, կարծում եմ, կան դեպքեր, որոնք հավելյալ վերանայման կարիք ունեն։ Հետևաբար՝ վերջերս ես դրա համար Դավիթ Բեկ գյուղի մասով հարց բարձրացրեցի։ Այստեղ նաև կարևորում եմ, որ Արծվանիկ բնակավայրի բնակիչներն քառասունհազարական դրամ փոխհատուցում է տալիս Քաջարանի պղնձամոլիբդենային կոմբինատը։ Եվ ոչ միայն Արծվանիկին, այլև պոչամբարի հարևանությամբ գտնվող բնակավայրերի բնակիչներին։ Ես այդտեղ էլ եմ ռիսկ տեսնում, որ կարող է դավիթբեկցին որոշի տեղափոխվել Արծվանիկ գյուղում ապրելու, և, ինչու չէ, օգտվելու նաև այդ 40 հազար դրամից։

Դուք նշել եք, որ Դավիթ Բեկի դպրոցի շենքը թեթև վերանորոգմամբ կարող է շարունակել գործել։ Ի՞նչ խնդիրներ կան շենքում այս պահին։

Շենքը միջին վիճակում է, բայց, համեմատած կապիտալ կառուցվող դպրոցի, էական ավելի քիչ գումարով վերանորոգման արդյունքում շենքը հնարավոր է շահագործել գոնե ոչ թե որպես դպրոց, այլ որպես կրթական այլ ծառայություն մատուցող կառույց։

Դավիթ Բեկի բնակիչների կարծիքը հաշվի առնվո՞ւմ է։ Ի՞նչ տրամադրություններ կան գյուղում այդ մասով՝ մանավանդ, որ նոր դպրոցը կառուցվում է Արծվանիկի պոչամբարի շրջակայքում, ինչը առողջության տեսակետից կարող է վնասակար լինել երեխաների համար։

Դավիթ Բեկի բնակիչներից բազմիցս ահազանգեր, խնդրանքներ ստացել եմ՝ հարցը բարձրաձայնելելու մասով։ Ես առաջին անգամ չէ, որ այդ հարցը բարձրաձայնում եմ, առաջին անգամ է, որ բարձրաձայնում եմ ԿԳՄՍ նախարարի մոտ և ուղիղ եթերով։ Բայց տարբեր գերատեսչությունների, այդ թվում ժամանակին Տարածքային նախարարության, Տարածքային զարգացման հիմնադրամի (որի միջոցներով կառուցվում են դպրոցները) մոտ, այս հարցը բարձրացրել եմ։ Բնականաբար՝ գյուղի բնակիչների մոտ այդ հարցը կա և օրակարգային է։