Հայաստանում առաջին անգամ նշվում է Հայրերի օրը
Այսօր՝ հունիսի 17-ին, Հայաստանում առաջին անգամ պաշտոնապես նշվում է Հայրերի օրը։ Սա նոր պետական տոն է, որն ուղղված է ընտանիքում հոր դերի ճանաչմանն ու արժևորմանը։ Օրենսդրական փոփոխությունն իրականացվել է դեռևս 2024 թվականին՝ Ազգային ժողովի պատգամավոր Զարուհի Բաթոյանի նախաձեռնությամբ։
Նախագծի հիմնավորմամբ՝ մինչ այս Հայաստանում օրացուցային տոն էր միայն Մայրության և գեղեցկության օրը՝ ապրիլի 7-ը, իսկ հայրերն այդպես էլ տոն չունեին։ Մինչդեռ հոր դերակատարությունն ընտանիքի կայունության, երեխաների դաստիարակության և համայնքային արժեքների պահպանման գործում նույնքան կարևոր է։
Նշենք, որ Հայրերի օրն աշխարհի բազմաթիվ երկրներում արդեն ավանդաբար նշվում է։ Որոշ երկրներում այն նշվում է հունիս ամսվա երկրորդ կիրակի օրը, մյուս երկրներում կան հատուկ սահմանված օրեր։
Այս տարվա առթիվ Աշխատանքի և սոցիալական հարցերի նախարարությունը մեկնարկել է «Հայրի՛կ, սիրում եմ քեզ» խորագրով հանրային արշավ, որի նպատակն է ուշադրություն հրավիրել հոր ու որդու, հոր ու դստեր հարաբերությունների վրա, որը կլինի սեր ու աջակցություն ցուցաբերելու ուղերձ։
Հայրերի օրը կոչված է ոչ միայն շնորհակալություն հայտնելու հայ հայրիկներին, այլ նաև հիշեցնելու, որ ամուր ու առողջ հասարակություն հնարավոր է միայն այն ժամանակ, երբ ընտանիքում սերը, հարգանքը և պարտքի զգացումը փոխադարձ են։