Կաթնամթերքի ընտրությունը հեշտանում է. գույները կօգնեն սպառողներին
Հայաստանի խանութներում կաթնամթերքը շուտով կդասավորվի տարբեր գույնի դարակներում՝ սպառողներին օգնելու տարբերակել մաքուր և փոխարինիչներով արտադրանքները։ «Առևտրի և ծառայությունների մասին» օրենքում համապատասխան փոփոխությունների նախագիծը խորհրդարանն ընդունեց երկրորդ ընթերցմամբ: Օրինագիծը քննարկվել է շուրջ հինգ տարի՝ 2020 թվականից սկսած։
Ըստ նոր փոփոխությունների՝ մաքուր կաթնամթերքը (առանց կաթնային յուղի փոխարինիչների) վաճառվելու է կանաչ դարակներում, իսկ փոխարինիչներով կաթնամթերքը՝ նարնջագույններում։
Նախկինում առաջարկվել էր գունային տարբերակումը տարածել նաև ապրանքների փաթեթավորման վրա, սակայն Եվրասիական տնտեսական հանձնաժողովը (ԵՏՀ) չի հաստատել այս մոտեցումը։ Հետևաբար, արտադրողները շարունակում են ունենալ ազատություն՝ ընտրելու իրենց ապրանքների փաթեթավորման գույնը։
Այսօր խանութների ոչ բոլոր թթվասերներն են կաթնամթերք: «Մի մասը սոյայի յուղով է, մի մասը չգիտեմ՝ ինչի յուղով է: Մենք չենք կարող այդ տնտեսվարողներին արգելել այդպիսի թթվասեր ունենալ խանութներում, որովհետեւ դա համապատասխանում է մեր ստանդարտներին: Ինձ ասում են, որ այնտեղ գրված է պարունակությունը: Բայց ես ասում եմ, որ երբ մարդը աշխատանքից գնում է տուն, եւ կինը կամ ամուսինը զանգում ասում են՝ թթվասեր բեր, մարդը հետը խոշորացույց չպիտի ունենա, որ նայի, թե թթվասերն ինչ բաղադրություն ունի, — հայտարարել էր Փաշինյանը դեռ 5 տարի առաջ։
Նշենք, որ ԵԱՏՄ տեխնիկական կանոնակարգով արդեն արգելվում է փոխարինիչներով արտադրանքների փաթեթավորման վրա գրել «կաթ», «թթվասեր» և այլ անվանումներ, որոնք բնորոշ են մաքուր կաթնամթերքին։ Սակայն գործնականում այս կանոնը հաճախ չէր պահպանվում։
Նոր փոփոխությունը նպատակ ունի հեշտացնել սպառողների ընտրությունը՝ ապահովելով ավելի թափանցիկ մթնոլորտ շուկայում։