Ֆինանսների նախարար Վահե Հովհաննիսյանը հարցաքննվել է․ ի՞նչ է հայտնի
ՀՀ ֆինանսների նախարար Վահե Հովհաննիսյանը այսօր լրագրողների հետ հանդիպման ժամանակ հաստատեց, որ 2 օր առաջ հարցաքննվել է ապօրինի ձեռնարկատիրական գործունեությամբ զբաղվելու վերաբերյալ քրեական գործի շրջանակում։
Նախարարն ընդգծեց, որ ինքը ձեռնարկատիրությամբ չի զբաղվել այն պահից սկսած, երբ դարձել է պետական պաշտոնյա, թեև նախկինում որոշ նախաձեռնություններ եղել են։ Հովհաննիսյանի խոսքով՝ հարցաքննությունը անցկացվել է վկայի կարգավիճակով և ոչ որպես մեղադրյալի։
Ավելի վաղ հայտնի էր դարձել, որ քրեական գործը վերաբերում է տեղեկատվական տեխնոլոգիաների ոլորտում գործունեություն ծավալող և պետությունից ստարտափի արտոնագիր ստացած «Կարիտաս Իտալիանա» ՓԲԸ–ի հետ նախարարի կապերին։ Գործը նախաձեռնվել էր ապօրինի ձեռնարկատիրական գործունեության հնարավոր առնչությամբ։
Հիշեցնենք, որ 2024 թվականի դեկտեմբերի 4-ին Արա Զոհրաբյանը՝ Փաստաբանների ակադեմիայի նախկին ռեկտորը, մի խումբ իրավաբանների հետ դիմել էր գլխավոր դատախազություն՝ առաջարկելով Վահե Հովհաննիսյանի դեմ կոռուպցիոն ռիսկ պարունակող վարույթ հարուցել։ 2025 թ. ապրիլի սկզբին հայտնի էր դարձել, որ նույն տարվա փետրվարի 27-ի այս գործով գործ հարուցելուց հրաժարվելու մասին հակակոռուպցիոն դատարանի որոշումը չեղարկվել է, և Վերաքննիչ դատարանը պարտավորեցրել է քրեական վարույթ հարուցել։