Սլովակիայի վարչապետը առաջարկում է Հայաստանին համագործակցել զենքի արտադրության ոլորտում, մինչդեռ զենք վաճառում Ադրբեջանին
Սլովակիայի վարչապետ Ռոբերտ Ֆիցոն Հայաստանում՝ «Երևանյան երկխոսություն-2» համաժողովին մասնակցելու ընթացքում, ներկայացրել է համագործակցության նոր հնարավորություններ՝ պաշտպանական արդյունաբերության ոլորտում։
Համագործակցության մյուս ոլորտը, որը մենք շատ բաց քննարկեցինք, պաշտպանական արդյունաբերությունն է: Ես ասացի, եթե թույլ կտաք կրկնեմ իմ ասածը՝ եթե մենք չարտադրենք զենք, մեկ ուրիշը դա կանի, և մենք ստիպված կլինենք գնել։ Եթե մենք պետք է շատ գումար ծախսենք մեր պաշտպանության վրա, ապա անենք այն, ինչ մենք կարող ենք անել, որպես փոքր երկրներ, գտնենք ապրանքներ, որոնք մեր կարիքները կբավարարեն, և միևնույն ժամանակ այս համագործակցությունը մեզ չի ստիպի գնել ուրիշ խոշոր գործընկերներից, Հյուսիսատլանտյան դաշինքից, — հայտարարեց Ֆիցոն ասուլիսի ժամանակ:
Կողմերը քննարկել են նաև միջուկային էներգետիկայի ոլորտում համագործակցության հնարավորությունները։ Ռոբերտ Ֆիցոն հրավիրել է Նիկոլ Փաշինյանին Սլովակիա՝ շարունակելու երկկողմ համագործակցությունը։
Չնայած Ֆիցոյի նման հայտարարություններին՝ Սլովակիան երկար տարիներ եղել է Ադրբեջանի զենքի մատակարարը։ Սլովակիան, ըստ կազմակերպված հանցագործության և կոռուպցիայի հետազոտության կենտրոնի հրապարակած զեկույցի, անմիջական մասնակցություն է ունեցել Չեխիայից Ադրբեջան զենքի և զինամթերքի տեղափոխմանը։
Շվեդական SIPRI հետազոտական ինստիտուտի տվյալներով՝ Սլովակիան մատակարարել է 152 մմ «Dana» ինքնագնաց հաուբիցներ, իսկ Չեխիան՝ 122 մմ «RM-70» համազարկային կրակի ռեակտիվ համակարգեր, որոնք նախկինում օգտագործված են եղել։ Դրանք Իսրայելում թարմացվել և ապա ուղարկվել են Ադրբեջան։