Հալեպում գիշերները պարետային ժամ է հայտարարվում․ Զարմիկ Պողիկյան
Իսլամական Հայաթ Թահրիր ալ-Շամ ռազմաքաղաքական կազմակերպության ղեկավարությամբ գործող զինյալները արդեն քանի օր է մեծ ավերածություններ են գործում Հալեպում և Իդլիբում։ Երկրում տեղի ունեցող իրադարձությունների և հայ համայնքի վիճակի մասին խոսել ենք Հալեպի «Գանձասար» շաբաթաթերթի խմբագիր Զարմիկ Պողիկյանի հետ։
— Ինչպիսի՞ն է հիմա իրավիճակը Հալեպում։ Ի՞նչ տրամադրություններ կան մարդկանց շրջանում։
Քաղաքը ընդդիմադիրների վերահսկողության տակ է։ Ժողովուրդը շատ քիչ է բնակարաններից դուրս գալիս։ Մի շարք շրջաններում բախումների ձայներ են լսվում, օդային հարձակումներ կան։ Այսպիսի մթնոլորտի մեջ է քաղաքը։ Բնակչությունը բնակարաննարից դուրս է գալիս միայն անհրաժեշտ կարիքները հոգալու համար։ Դպրոցները, բոլոր հաստատությունները առայժմ փակ են։ Մի քիչ պարենային նյութերի ապահովման դժվարություններ կարող են առաջանալ առաջիկա օրերին, որովհետև բոլոր ճանապարհները փակ են։ Որոշ խանութներ մի քանի ժամով բացվում են, իրենց ունեցածը սպառում են և կրկին փակվում, որովհետև գրեթե ամեն օր 12 ժամ պարետային ժամ է հայտարարվում, առավելապես՝ գիշերները։
— Երկրում ստեղծված ծանր պայմաններում ինչպե՞ս են ապրում մեր հայրենակիցները և ի՞նչ խնդիրների են բախվում։
Ամբողջ Հալեպի բնակչությունը մտահոգ է, նրանց թվում նաև հայ համայնքը։ Բոլորը սպասում են, թե առաջիկա օրերին ինչ համաձայնություններ ձեռք կբերվեն։ Այսօր մեր հայ երիտասարդներից մեկն է մահացել՝ դիպուկահարի հարվածից։ Բայց քաղաքի մեջ այլ վիրավորներ և զոհեր չկան։ Թաղամասերում, ընդհանուր առմամբ, անմիջական վտանգ չկա, բայց քաղաքը պատերազմական վիճակի մեջ է։
— Անհրաժեշտության դեպքում հնարավոր կլինի՞ ապահովել մեր հայրենակիցների անվտանգ ելքը Հալեպից։
Սկզբնական օրերին՝ այսինքն՝ ուրբաթ, շաբաթ օրերին, որոշները լքել են քաղաքը և մեկնել ավելի ապահով Լաթակիա, Դամասկոս և այլն։ Եղան այնպիսի դեպքեր, երբ ընտանիքները իրենց սեփական մեքենաներով լքեցին քաղաքը, բայց հիմա այդ ճանապարհն էլ է փակվել։ Խանասերի ճանապարհը փակ է և վտանգավոր։ Այնպես որ քաղաքից դուրս գալու միջոց այժմ չկա։
— Տեղի հայ համայնքի հետ կապը ինչպե՞ս է պահվում։
Ազգային առաջնորդարանը հաճախ հաղորդագրություններով լուսաբանումներ է անում ժողովրդի համար, փորձում այնպես անել, որ ժողովուրդը խուճապի չմատնվի, դիմում է մարդկանց, որ իրենց կացության մասին տեղեկություններ տան և անհրաժեշտության դեպքում պատրաստ են նաև օգնության հասնել։