Հայաստանի Սահմանադրության հարցը չի հանդիսանում խաղաղության պայմանագրի մաս․ ԱԳ փոխնախարար
Լրագրողներին տված ճեպազրույցում ԱԳ փոխնախարար Վահան Կոստանյանը անդրադարձել է հայ-ադրբեջանական հարաբերություններին։ Նա հայտարարել է, որ Հայաստանի և Ադրբեջանի միջև կոնկրետ պայմանավորվածություն չկա նախարարական կամ երկրների ղեկավարների մակարդակով հանդիպումներ անցկացնելու վերաբերյալ, սակայն հայկական կողմը շահագրգռված է հանդիպումները ինտենսիվացնել, որպեսզի հնարավոր լինի հնարավորինս կարճ ժամկետում ավարտել համատեղ համաձայնագրի տեքստի մշակումը։
Ադրբեջանը ուղարկել է խաղաղության պայմանագրի վերաբերյալ խմբագրումների 11-րդ տարբերակը։ Այս պահին կան հարցեր, որոնք դեռևս համաձայնեցված չեն կողմերի միջև։ Բանակցությունները շարունակվում են։ Սահմանադրության հարցը չի հանդիսանում խաղաղության պայմանագրի մաս։ Քննարկումներ չկան նաև ապառազմականացման վերաբերյալ։
Համաձայնագրի տեքստում, ըստ Կոստանյանի, ապաշրջափակման մասին կետ չկա, բայց թեմայի շուրջ քննարկումները շարունակվում են: Պետական սահմանի սահմանազատման և սահմանային անվտանգության հարցերով հանձնաժողովների հանդիպման ավարտից հետո հարցը քննարկել են Հայաստանի և Ադրբեջանի փոխվարչապետերը։