Վարդանյանի դեմ ցուցմունք տվածները հոգեպես անկայուն են և ենթարկվել են ճնշման
Ռուբեն Վարդանյանի դեմ ցուցմունք տված 2 հայերը հոգեկան անկայունության խնդիրներ ունեն, նրանցից մեկը նաև ալկոհոլիկ է։ Այս մասին լրագրողների հետ զրույցում հայտարարել է Արցախի մարդու իրավունքների նախկին պաշտպան Արտակ Բեգլարյանը։
Իրականում, չգիտեմ` ինչու են մնացել Արցախում, չեմ ցանկանում որևէ կերպ քննադատել, բայց իրենք այն անձինք չեն, որ բարձր կամքի տեր լինեն ու ազդեցության տակ չընկնեն։ Կա՛մ ադրբեջանցիները որևէ կերպ պարտադրել են, որպեսզի կեղծ զրպարտանք ու մեղադրանք ներկայացնեն Ռուբեն Վարդանյանի դեմ, կա՛մ ինչ-որ կերպ խրախուսել են, — նշեց Բեգլարյանը։
Նշենք, որ օրեր առաջ ադրբեջանական ԶԼՄ-ները հայտնել էին, որ Ռուբեն Վարդանյանի դեմ ցուցմունք են տվել ազգությամբ հայ Մուշեղ Գրիգորյանն ու Կամո Հայրապետյանը։ Կամո Հայրապետյանը հայտարարել է, որ Ռուբեն Վարդանյանի Արցախ գալուց հետո ականապատման աշխատանքները Ստեփանակերտի տարածքում մեծ ծավալների են հասել։ Սակայն Կամո Հայրապետյանի ընտանիքի անդամները հայտարարել էին, որ նրան հավանաբար ստիպել են ցուցմունք տալ Ռուբեն Վարդանյանի դեմ։
Նրանց ելույթներին էր անդրադարձել նաև Ռուբեն Վարդանյանը՝ մարտի 12-ի նոր ուղերձի մեջ։
Այս վերջին դատական նիստը վառ օրինակ էր այն բանի, թե ինչ տեղի կունենար, եթե արցախցիները մնային իրենց տանը և ինչ գին կվճարեին դրա համար: Այդ նիստում Ստեփանակերտում ապրող երկու արցախահայ իմ դեմ ցուցմունք տվեցին՝ այդ թվում պնդելով տարբեր անհավանական բաներ: Ընդ որում, նրանք կյանքում ինձ չեն էլ տեսել, բացի այդ, նրանք իրենք էին գտնվում սարսափելի վիճակում, բայց այդուհանդերձ, հանդես եկան դատարանում, և ես նրանց շատ խղճացի:
Մարդն ամեն ինչի համար ինչ-որ գին է վճարում. և այն հայի օրինակը, որին ձերբակալել-տարել էին հենց Կարմիր Խաչի ավտոմեքենայից ու դատապարտել տասնհինգ տարվա ազատազրկման, և այս երկու անձանց օրինակը պարզ զգուշացում է, որ ձեզ ձեր տներում հանգիստ թույլ չէին տա ապրել:
2025 թվականի մարտի 11-ին ադրբեջանական լրատվամիջոցները գրել էին, որ ադրբեջանցի «տուժողները» նույնպես Ռուբեն Վարդանյանի դեմ ցուցմունքներ են տվել:
Նշենք, որ այս պահին Արցախում մոտ մեկ տասնյակ հայ կա: Այնտեղ ապրող ընդամենը մեկ-երկու հոգի է հարազատների հետ կոնտակտ պահում, մյուսները կա՛մ հարազատներ չունեն, կա՛մ շփումներ չունեն, կա՛մ էլ խնդիրներ ունեն առողջության հետ կապված: