Փաշինյանը վստահ է՝ «Խաղաղության խաչմերուկ»-ը իրականություն կդառնա
Հայաստանի վարչապետ Նիկոլ Փաշինյանը Ստամբուլում Թուրքիայի հայ համայնքի ներկայացուցիչների հետ հանդիպման ժամանակ հայտարարել է, որ «Խաղաղության խաչմերուկ» նախաձեռնությունը վաղ թե ուշ կյանքի է կոչվելու։
«Խաղաղության խաչմերուկ»-ը չի կարող չիրականանալ։ Դա ժամանակի հարց է։ Այլ բան է, որ ժամանակը կարող է մի քիչ կարճ լինել, մի քիչ երկար լինել։ Բացառված է, որ դա տեղի չունենա: Խաղաղության խաչմերուկ»-ը արդեն երկու տարի գոյություն ունի, և առաջին անգամ է, որ ես Թուրքիայի նախագահի հետ դեմ դիմաց հանգիստ ներկայացնելու եմ մեր ծրագիրը,– նշել է վարչապետը՝ ընդգծելով, որ առաջին անգամ հնարավորություն է ունենալու անձամբ Թուրքիայի նախագահի հետ հանգիստ քննարկել ծրագիրը։
Վարչապետը նաև նշել է, որ երբ ծրագիրը գործարկվի, Ադրբեջանը հնարավոր է փորձի այն ներկայացնել որպես «Զանգեզուրի միջանցքի» իրականացում։
Պատասխանելով այն մտահոգությանը, թե արդյոք Թուրքիայի նպատակը «Մեծ Թուրանի» ծրագիրը չէ և «Զանգեզուրի միջանցքի» բացումը դրա մաս է, Փաշինյանը նշել է․
Մենք էլ, Թուրքիան էլ ճանապարհներ ենք ուզում։ Եկեք բացենք սահմանները… Մենք այդ ամեն ինչին մի վերնագիր ենք դնում՝ Թուրան, ու վերջ։ Գնաց։ Վայ, վայ… Եկեք մենք էլ ապրենք, ուրիշներին էլ մեր չափով հնարավորություն տանք ապրելու։
Վարչապետը խոսել է նաև Հայաստանի աշխարհաքաղաքական դիրքի մասին՝ ասելով, որ երկիրը գտնվում է միջազգային հաղորդակցության մայրուղու վրա, բայց «անընդհատ վրաերթի է ենթարկվում»։ Նրա համոզմամբ՝ Հայաստանը պետք է դառնա ակտիվ դերակատար այդ հաղորդակցության մեջ, այլ ոչ թե պարզապես տարածք։
Հիշեցնենք, որ Փաշինյանի գլխավորած պատվիրակությունը հունիսի 20-ին մեկօրյա աշխատանքային այցով մեկնել էր Թուրքիա։ Այցի մանրամասները նախատեսվում է հրապարակել կողմերի փոխադարձ պայմանավորվածությամբ։