Իրանի գերագույն առաջնորդի խորհրդականը զգուշացնում է՝ «Զանգեզուրի միջանցքը» կվտանգի Հայաստանի գոյությունը
Իրանը կրկին դեմ է արտահայտվել այսպես կոչված «Զանգեզուրի միջանցքի» ստեղծմանը, որը նախատեսվում է անցկացնել Հայաստանի տարածքով և կապել Ադրբեջանի հիմնական մասը Նախիջևանի հետ։ Իրանի գերագույն առաջնորդի միջազգային հարցերով խորհրդական Ալի Աքբար Վելայաթին հայտարարել է, որ այս նախագիծը ոչ միայն կփոխի տարածաշրջանի աշխարհաքաղաքականությունը, այլև կվտանգի Հայաստանի գոյությունը։
Վելայաթին նշել է, որ միջանցքի ստեղծումը կարող է վերաձևել սահմանները և հանգեցնել Հայաստանի փլուզման։ Նա հիշեցրել է, որ վարչապետ Նիկոլ Փաշինյանը նախկինում Իրան կատարած այցերի ընթացքում նույնպես դեմ է արտահայտվել այս գաղափարին: Այն համընկնում է Իրանի դիրքորոշման հետ։
Նրա խոսքով՝ այս միջանցքը պարզապես առևտրային ճանապարհ չէ, այլ քաղաքական դավադրություն Իրանի և տարածաշրջանի այլ պետությունների դեմ։
ՆԱՏՕ-ն, Թուրքիայի աջակցությամբ, փորձում է ամրապնդվել Հարավային Կովկասում և տեղակայվել Իրանի ու Ռուսաստանի միջև, բայց Իրանը դա թույլ չի տա, – ասել է Վելայաթին։
Իրանի նախկին արտգործնախարարը վստահեցնում է, որ Ադրբեջանի և Նախիջևանի միջև կապը կարելի է ապահովել Իրանի տարածքով՝ առանց Հայաստանի տարածքային ամբողջականությանը սպառնալու։
Հիշեցնենք, որ օգոստոսի 8-ին Վաշինգտոնում կայացել է Փաշինյանի, Թրամփի և Ալիևի եռակողմ հանդիպումը, որի արդյունքում ստորագրվել է հռչակագիր։ Փաստաթղթում ամրագրվել է Հայաստանի և Ադրբեջանի միջև խաղաղության պայմանագրի նախաստորագրումը, Մինսկի գործընթացի լուծարումը և Հայաստանի տարածքով Ադրբեջանի ու Նախիջևանի միջև հաղորդակցության ապահովումը՝ հարգելով պետությունների ինքնիշխանությունն ու սահմանները։