Փաշինյանը բացատրել է՝ ինչու գերիների հարցը չներառվեց խաղաղության համաձայնագրում
Հայաստանի վարչապետ Նիկոլ Փաշինյանը ուղիղ եթերում հղած ուղերձում հաստատեց, որ հայ–ադրբեջանական խաղաղության համաձայնագրի բանակցությունների ընթացքում գերիների հարցը ներառելու ուղղությամբ լուրջ ջանքեր են գործադրվել։ Փաշինյանը հիշեցրեց, որ բանակցությունները սկսվել են դեռ 2022 թվականի գարնանը։
Մենք ամեն ջանքն գործադրեցինք, որ գերիների հարցը ներառենք համաձայնագրում։ Սակայն պարզվեց, որ եթե այս հարցը նշվեր փաստաթղթում, Ադրբեջանում պահվող մեր հայրենակիցների վերադարձը կարող էր ընկալվել, որ այն կախված է համաձայնագրի ստորագրումից ու վավերացումից։ Այդ կանխավարկածով մենք երբեք չենք առաջնորդվել, և դրա շնորհիվ մեր 58 հայրենակիցներ արդեն վերադարձվել են գերությունից,– ասաց վարչապետը։
Նա ընդգծեց, որ գերիների հարցը լուծելու համար դիվանագիտական աշխատանքը շարունակվում է և ամենայն հնարավոր ջանքերը գործադրվում են խնդիրն արագորեն կարգավորելու համար։
Հիշեցնենք, որ օգոստոսի 8-ին Վաշինգտոնում Նիկոլ Փաշինյանն ու Ադրբեջանի նախագահ Իլհամ Ալիևը ստորագրեցին 7 կետից բաղկացած համատեղ հռչակագիր։ Դրա շրջանակում նախատեսվում է Սյունիքի մարզով «Թրամփի ուղի» (TRIPP) ստեղծել՝ Ադրբեջանին Նախիջևան առևտրային հասանելիություն ապահովելու համար։ Այս ճանապարհը ԱՄՆ-ն վարձակալում է 99 տարով՝ ևս 99 տարով երկարաձգելու հնարավորությամբ։
Միաժամանակ Հայաստանի և Ադրբեջանի արտգործնախարարները՝ Արարատ Միրզոյանն ու Ջեյհուն Բայրամովը, նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։