Հայաստանը չի կարող հրաժարվել Արծվաշենից
ՀՀ վարչապետ Նիկոլ Փաշինյանը կառավարության նիստից հետո ճեպազրույցում հայտարարել է, որ Հայաստանը չի կարող հրաժարվել էքսկլավ-անկլավների հարցից, քանի որ հայկական կողմն ունի Արծվաշեն։
Արծվաշենից՝ որպես Հայաստանի ինքնիշխան տարածքի մաս, մենք չենք կարող հրաժարվել։ 1991 թվականի Ալմա Աթայի հռչակագիրն արձանագրում է, որ Խորհրդային Հայաստանը իր ամբողջական ադմինիստրատիվ սահմաններով դառնում է անկախ Հայաստան, նույնը վերաբերում է նաև Ադրբեջանին։ Այսինքն՝ 2022 թվականի Պրահայում ձեռք բերած պայմանավորվածության շրջանակում մենք գնում ենք ինստիտուցիոնալացման ուղով, — ասել է Փաշինյանը։
Նա շեշտել է, որ Հայաստանը շարունակում է խաղաղության ճանապարհով շարժվել Ադրբեջանի հետ և «այդ նավը հասցնելու ենք իր հանգրվանին, և նավամատույցները դարձնելու ենք ավելի հուսալի ու կայուն»։
Հիշեցնենք, որ Ադրբեջանի փոխվարչապետ Շահին Մուստաֆաևի գրասենյակը 2024 թվականի մարտին հայտարարել էր՝ սահմանագծման գործընթացում պետք է լուծվի «չորս էքսկլավ գյուղերի ազատագրման հարցը»։ Խոսքը հայկական Վերին Ոսկեպար ու Տիգրանաշեն, Սոֆուլուի և Բարխուդարլիի (չբնակեցված) մասին է։ Բաքուն պահանջում է նաև չորս ոչ էքսկլավային գյուղեր՝ Բաղանիս Այրիմ, Աշաղի Ասկիպարա, Հեյրիմլի և Գըզըլգաջըլի։
Վերջերս էլ լրագրողների հետ հարցազրույցում Փաշինյանն էր հայտարարել, որ «ինչպես Ադրբեջանի վերահսկողության տակ կան Հայաստանի ինքնիշխան տարածքներ, այնպես էլ կան Ադրբեջանի տարածքներ, որոնք գտնվում են Հայաստանի վերահսկողության տակ»։