Նարեկ Կարապետյանը հայտարարեց «Մեր ձևով» կամավորական շարժման ստեղծման մասին
Գործարար Սամվել Կարապետյանի եղբորորդին, «Տաշիր գրուպ» հոլդինգի ղեկավարի տեղակալ Նարեկ Կարապետյանը օգոստոսի 29-ի ասուլիսում ներկայացրեց նորաստեղծ «Մեր ձևով» կամավորական շարժումը։ Կարապետյանի խոսքով՝ շարժումը ապաքաղաքական կամավոր միավորում է, որի նպատակն է տարբեր մասնագիտությունների ու հայացքների տեր մարդկանց համախմբումը հանրօգուտ նախաձեռնությունների շուրջ։
Շարժման համակարգողը նաև անդրադարձավ երկրի հասարակական-քաղաքական իրավիճակին՝ նշելով, որ հասարակության սպասելիքները չեն բավարարվում, իսկ իշխանության և ընդդիմության միջև ատելության մթնոլորտը խոչընդոտում է սթափ գնահատականներին։
Շարժումը գործելու է հինգ ուղղություններով՝ տնտեսական (Աշոտ Ֆարսյանի գլխավորությամբ), ժողովրդագրական (Արեգա Հովսեփյան), արտաքին քաղաքականություն (Արթուր Դանիելյան), կրթական (Գոհար Գումաշյան) և Հայ առաքելական եկեղեցու ու ազգային արժեքների պահպանման (Ալեքսան Ալեքսանյան)։
Նա ընդգծեց, որ նախաձեռնությունը շարժման առաջին փուլն է, իսկ երկրորդում նախատեսվում է կուսակցություն հիմնել։
Սա հարմար ձևաչափ է, որը թույլ կտա առանց հասարակությանը բաժանելու մեծ ու բարի գործեր անել։ Մեր մշակած ծրագրերն ու նախագծերը կուսակցության միջոցով կվերածենք պետական ծրագրերի։ Վստահ ենք, որ 2026 թվականի ընտրությունների արդյունքում դա հնարավոր կլինի,– ասաց Կարապետյանը։
Ինչպես ավելի վաղ հայտնել էինք, օգոստոսի 13-ին Սամվել Կարապետյանը մեկուսարանից ասել էր, որ առաջիկայում կներկայացվի «Մեր ձևով» շարժումը։