Ինքնակամ շինությունների հաշվառման ժամկետները կերկարաձգվեն
Ինքնակամ կառուցված շինությունների հաշվառման ժամկետները նախատեսվում է երկարաձգել։ Կադաստրի կոմիտեն շրջանառության մեջ է դրել իրավական ակտերի նախագծեր, որոնք հնարավորություն կտան մեկանգամյա երկարաձգել մինչև 2021 թվականը կառուցված շինությունների հաշվառման գործընթացը։
Այս քայլի նպատակն է քաղաքացիներին տալ ևս մեկ հնարավորություն՝ մինչև 2021 թվականը կառուցված ինքնակամ կառույցները կամ կիսակառույց հատվածները գրանցելու և հետագայում դրանք օրինականացնելու համար։ Շատերի համար սա կարևոր հնարավորություն է, քանի որ հաշվառման բացակայությունը խոչընդոտում է շինությունների հետ կապված օրինական գործարքների իրականացումը։
Կոմիտեն ընդգծում է, որ վերջնական ժամկետները կհաստատվեն միայն նախագծերի ընդունումից հետո։ Դրանից հետո հանրությունը լրացուցիչ կտեղեկացվի, որպեսզի բոլոր ցանկացողները հասցնեն օգտվել հաշվառման նոր հնարավորությունից։
Նախագծերին կարելի է ծանոթանալ Կադաստրի կոմիտեի պաշտոնական հարթակում։