Ընտանիքի անդամների միջև փոխանցումները հարկային հայտարարագրման ենթակա չեն լինելու
Ազգային ժողովում պատգամավոր Բաբկեն Թունյանը ներկայացրել է փոփոխությունների նախագիծ, որն առնչվում է եկամուտների հայտարարագրման կարգին։ Նա պարզաբանել է, որ քաղաքացու աշխատավարձը, թոշակը կամ կենսաթոշակը, ինչպես նաև ավանդներից ստացած եկամուտները համակարգը ինքնաշխատ կլրացնի։ Սակայն եթե քաղաքացիները ցանկանում են օգտվել սոցիալական վճարի վերադարձից, անպայման պետք է մուտք գործեն հայտարարագրման համակարգ։
Բաբկեն Թունյանի ներկայացրած փոփոխություններով քաղաքացիները պարտավոր չեն լինելու հայտարարագրել ընտանիքի անդամների միջև փոխանցումները։
Ընտանիքի անդամներից դուրս՝ բարեկամների միջև՝ հորաքույր, մորաքույր, ընկերոջ հորաքույր, այդ տիպի փոխանցումների վրա ՊԵԿ-ի առաջարկությամբ սահմանաչափ է դրված: Այդ պահին 300 հազար դրամ է։ Հիմնական շահարկումը եկամուտները հարկելու վերաբերյալ էր, ու այստեղ ուզում եմ նշել, որ այդ եկամուտները հարկման ենթակա չեն, չեն եղել և չեն լինելու:
Բացի այդ՝ հայտարարագիր չներկայացնելու համար նախկինում սահմանված տուգանքներն էլ կվերացվեն։ Քաղաքացիները չեն գրանցի նաև իրենց ավանդներից ստացած եկամուտները, բայց համակարգում հնարավորություն կտան ՊԵԿ-ին բանկերից ստանալ ավանդների քաղվածքների մասին տեղեկությունները։
Ֆիզիկական անձանց կողմից ստացված վարկերը և փոխառությունները նույնպես չեն հայտարարագրվի։
ՀՀ բոլոր այն քաղաքացիները, որոնք հայտարարատու են ըստ օրենքի, կարող են մինչև վերջնաժամկետը չմտնել և չլրացնել իրենց հայտարարագրերը, և իրենց հայտարարագրերը կհամարվեն լրացված և հանձնված այն ինֆորմացիայի հիման վրա, որը ՊԵԿ-ին տեսանելի է: Այսինքն՝ եթե քաղաքացին վստահ է, որ իր ստացած եկամուտները հենց այնքան են, ինչքան ՊԵԿ-ը լրացրել է, ենթադրենք՝ աշխատավարձը, ինքը կարող է ոչինչ չանել, և ըստ այդմ՝ ՊԵԿ-ի տվյալների հիման վրա լրացված հայտարարագիրը կհամարվի լրացված և հանձնված: Ստացվում է, որ այլևս ՀՀ-ում չեն լինի քաղաքացիներ, որոնք եկամուտների հայտարարագիր լրացրած և հանձնած չեն լինի, ըստ այդմ՝ վերացնում ենք նաև պատասխանատվությունը հայտարարագիր չլրացնելու համար, — հայտարարել է Թունյանը։
Նոր կանոնակարգը ուժի մեջ կմտնի նոյեմբերի 1-ից։ Եթե հայտարարատուն դեռևս չունի նույնականացման քարտ, բայց դիմել է նույնականացման քարտ ստանալու համար, հայտարարագրման վերջնաժամկետը նրա համար նոյեմբերի 1-ը չի լինի, այլ նույնականացման քարտ տպագրելու օրը ներառող ամսվա հաջորդող ամսվա 25-ը։