ԱՄՆ-ից ավելի քան 2000 հայ քաղաքացի կարող է արտաքսվել
Հայաստանի իշխանությունները տեղեկացված են ԱՄՆ-ի կողմից ավելի քան 2000 Հայաստանի քաղաքացու արտաքսման մտադրության մասին։ Սրա մասին հայտարարել է Սփյուռքի գործերի գլխավոր հանձնակատար Զարեհ Սինանյանը՝ ընդգծելով, որ իրական թիվը կարող է շատ ավելի մեծ լինել։ Հանձնակատարը մամուլի ասուլիսի ժամանակ նշել է, որ սա ընդամենը առաջին խմբաքանակն է։
Հունվարի վերջին ԱՄՆ ներգաղթի և մաքսային ծառայությունը (ICE) զեկույց էր հրապարակել, որտեղ նշվում էր, որ ԱՄՆ իշխանությունների որոշմամբ՝ 2808 Հայաստանի քաղաքացի ենթակա է արտաքսման։ Զարեհ Սինանյանի խոսքով՝ արտաքսման ենթակա անձինք չեն կարող սփյուռքի մաս համարվել, քանի որ նրանք ԱՄՆ-ում գտնվել են ապօրինի։
Մենք գիտենք 2000-ից ավելի ՀՀ քաղաքացիների մասին, բայց այդ թիվը շատ ավելի մեծ է։ Նրանցից քանիսն են արդեն արտաքսվել՝ մեզ հայտնի չէ, — նշել է Սինանյանը։
Նա հավելել է, որ այս հարցով զբաղվում են այլ կառույցներ, և առայժմ որևէ հստակ տվյալ չկա այն մասին, թե քանի Հայաստանի քաղաքացի է արդեն իսկ արտաքսվել։ Սինանյանը շեշտել է, որ Հայաստանի իշխանությունները հետևում են այս գործընթացին և մշտապես կապի մեջ են համապատասխան կառույցների հետ։
Հիշեցնենք, որ ԱՄՆ-ում ապօրինի ներգաղթյալների նկատմամբ խստացված քաղաքականություն է տարվել վերջին տարիներին՝ վարչակազմի որոշումների համաձայն։ Pew Research Center-ի գնահատականները ցույց են տալիս, որ 11-ից 12 միլիոն անօրինական ներգաղթյալներ բնակվում են ԱՄՆ-ում: Սակայն, ըստ Թրամփի, նա մտադիր է արտաքսել 15-20 միլիոն ներգաղթյալի։