Բուսաբանական այգում ծառեր են հատվում․ բնապահպանները ահազանգում են
Մարտի 17-ից համացանցում մեծ արձագանք են գտել Բուսաբանական այգում տեղի ունեցած ծառահատումների մասին լուրերը։ Տնօրինության, բնապահպանների և ականատեսների կարծիքները այստեղ հակասում են միմյանց։ Պարզվել էր, որ Աճառյան-Ծարավ Աղբյուր փողոցների հատման կետին մոտ՝ Բուսաբանական այգու տարածքում, շուրջ 30 կաղնի ծառ է կտրվել։ Մարտի 18-ին Բուսաբանական այգու տնօրինությունը հայտարարել էր, մոտ 20 հատը հատվել են վերջին երկու տարվա` 2023-24 թվականների ընթացքում:
Տնօրեն Ժաննա Հովակիմյանը նշել էր, որ ինքը երկու ամիս է նշանակվել, դեռ գույքագրումը չի ավարտվել։
2025 թվականի մարտի 17-ին Երևանի բուսաբանական այգու դենդրոհավաքածուների հողամասում իրականացվել են կաղնու ծառուղու դիտարկում, ուսումնասիրություն։ Արդյունքում պարզվել է, որ ծառուղու երկարությամբ առկա էին մոտ 30 հատ հատված կոճղեր, ակնադիտական եղանակով դիտարկելիս ակնհայտ է, որ մեկ տասնյակից ավելի քանակությամբ կոճղերն ունեն մի քանի տարիների հատման վաղեմություն։ Մոտ 20 հատ կոճղեր հատվել են 2024 թվականի աշնանը։ Հատված կաղնու ծառերի կենսունակության աստիճանի որոշումը պահանջում է համալիր դենդրոչափական ուսումնասիրություն։
Բնապահպան Սիլվա Ադամյանը նշում է, որ ինքը վաղուց է արձագանքել այգում տեղի ունեցող իրադարձություններին, բայց իրեն ոչ ոք չի լսել։ Նա նշեց, որ տարիներ առաջ, երբ ինքը ահազանգել էր Ծարավ աղբյուրի հատվածում ծառահատումների մասին, իրեն ասել էին, որ հիշատակի պուրակ են սարքելու։ Բայց այսօր կարելի է տեսնել, որ այդ տարածքում ավտոմեքենաների կայանատեղի են կառուցել։
Մի տարուց ավելի է, ես ահազանգում եմ։ Դա նոր գործընթաց չէ։ Այդ մարդիկ, որ նկարել են, արդեն բանը բանից անցել էր։ Այնտեղ ոչ ծառ է մնացել, ոչ էլ բուսաբանական այգի։ Ամբողջ Ռուբինյան փողոցի տարածքի այդ մասը գնված է և շինարարություն է գնալու այդտեղ։ Մի բուռ բուսաբանական այգի է մնացել այնտեղ։ Ըստ երևույթին, իմ կարծիքով, նրանք ուզում են լուծարել բուսաբանական այգին։ Պատճառաբանելու են, որ ֆինանս չկա և հնարավոր չէ պահել, որովհետև կա այդպիսի մի նախագիծ՝ Գիտությունների ազգային ակադեմիայի տարբեր գիտահետազոտական ինստիտուտները միացնելու ծրագրի շրջանակներում։ Սա այդ գործընթացի մի մասն է, և սա փուլ առ փուլ է արվելու։ Ըստ իս՝ բուսաբանական այգին վերանալու է։
Սիլվա Ադամյանը տարօրինակ համարեց նաև նոր տնօրինության հայտարարությունները, թե իրենք ոչինչ չգիտեն հատված ծառերի վերաբերյալ։
Ընդհանրապես հնարավոր չի, որ տնօրինությունը ոչինչ չիմանար։ Դուք պատկերացնո՞ւմ եք, որ գողերը մտնեն ձեր տուն ու գործ անեն, ու դուք դրա մասին չիմանաք։ Կլինի՞ տենց բան։
Երբ որ ես մի անգամ ահազանգեցի, այդ ժամանակ դեռ Արսեն Գասպարյանն էր տնօրենը, ու ասեցի, որ ամբողջ շինարարական տեխնիկան մտելա ներս՝ դեպի այգի, Ծարավ աղբյուր փողոցի հատվածում ծառեր են հատվում, փոշու և կեղտի մեջ է կորած այդ տարածքը, ու դեռ էլի առաջ են գնում, որպեսզի շինարարություն անեն, Արսենն ասեց, որ դա ժամանակավոր երևույթ է։
Դրանից հետո, իր դիմումի համաձայն, նա դուրս եկավ աշխատանքից։ Ես հասկացա, որ ինքն էլ է, ըստ երևույթին, տեղյակ եղել, բայց որպեսզի ինքը էդ ամեն ինչի մեջ չմտնի, դուրս է եկել գործից։
Հիշեցնենք, որ Բուսաբանական այգին Գիտությունների ազգային ակադեմիայի Թախտաջյանի անվան Բուսաբանության ինստիտուտի կազմում ընդգրկված գիտական, էկոկրթական, ուսումնական և ռեկրեացիոն նշանակության հաստատություն է։ Այգու տնօրեն Արսեն Գասպարյանը հունիսից ազատվել էր աշխատանքից, նրան ժամանակավոր փոխարինել է Աննա Ղուկասյանը: Ժաննա Հովակիմյանը նշանակվել է այս տարվա հունվարին։
Դեռևս 2021 թվականին Կարեն Վարդանյանը 105 մլն դրամ էր նվիրաբերել Բուսաբանական այգուն, որով անցկացվել էր 5 կմ երկարությամբ ոռոգման ցանց, տեղադրվել էր պոմպակայան, խորքային հոր, 60 տոննա տարողությամբ բաք, 180 փական, կառուցվել էր ջրի ֆիլտրման ավազան։ Թե ինչու են այս պարագայում չորացել այգու կաղնիները, ըստ ամենայնի, պարզ կդառնա նաև հանձնաժողովի ուսումնասիրությունների ավարտին: