Սուրենավանում մանկապարտեզի շենքը վերադարձվել է համայնքին
Արարատի մարզի Սուրենավան բնակավայրում պետությանը վերադարձվել է նախկինում ապօրինի կերպով օտարված մանկապարտեզի շենքը և դրա հարակից հողատարածքը։ Գույքը համայնքի սեփականություն է գրանցվել 2025 թվականի հունիսի 18-ին՝ դատախազության միջնորդագրի հիման վրա։
Դատախազության ուսումնասիրությամբ պարզվել է, որ համայնքի նախկին ղեկավարը՝ խախտելով օրենքի պահանջները, մանկապարտեզի շենքը ձևական աճուրդի միջոցով 2018 թվականին փոխանցել է իր մտերիմներից մեկին։ Խոսքը վերաբերում է Բարեկամության փողոցի 23/3 հասցեում գտնվող 625.33 քմ մակերեսով շենքին և դրա հետ կապված 0.15878 հա հողատարածքին։ Գույքի կադաստրային արժեքը կազմել է ավելի քան 22 միլիոն դրամ։
Ըստ դատախազության՝ համայնքի ղեկավարը մոլորության մեջ է գցել և՛ ավագանու անդամներին, և՛ կադաստրի կոմիտեի պաշտոնատար անձանց՝ ընդունելով ոչ իրավաչափ որոշումներ, որոնց հիման վրա էլ իրականացվել է օտարումը։ Այս գործարքը, ըստ իրավապահների, վնաս է հասցրել համայնքի շահերին և խախտել է երեխաների կրթության իրավունքը։
Դատախազությունը ուղարկել է միջնորդագիր՝ պահանջելով վերացնել գույքի օտարման որոշումը և այն վերադարձնել համայնքին։ Միևնույն ժամանակ ընթանում են նաև քրեական վարույթ սկսելու և դատարան հայց ներկայացնելու գործընթացներ։