Շիրակում 30 տոկոսով ավելացել են հացահատիկային մշակաբույսերի ցանքատարածությունները․ ռիսկը մնում է կարկուտը
Ախուրյանցի Հովհաննես Գևորգյանն աշխատանքային օրը սկսել է առավոտյան 5-ից մինչև 11-ը։ Ասում է` 2011 թվականից ակտիվորեն զբաղվում է գյուղատնտեսությամբ, մոտավորապես 35, 40, երբեմն էլ տարեկան մինչև 50 հեկտար ցանքս է կատարում։ Ամեն տարի մշակում ու աճեցնում է 15-ից 20 հեկտար կարտոֆիլ, 20 հեկտար ցորեն, առվուտ, վարսակ, կորնգան։
Հաջողակ գյուղատնտես լինելու գաղտնիքը Գևորգյանն ասում է` այս գործը սիրելու ու հողին նվիրվելու մեջ է։
Հողը պահանջում է ֆիզիկական, նյութական մեծ ներդրում և, իհարկե, առատորեն պարգևատրում է, եթե եղանակը չխանգարի։ Գյուղատնտեսության պետական ծրագրեր կան, բայց բաց տեղերը ևս շատ են, — ասում է Գևորգյանը։
Օրինակ է բերում։ Եթե պետական գնումներ արվեն և ցորենը վաճառեն ոչ թե 80 դրամով, այլ գոնե 100 դրամով, ավելի շատ կցանեն։ Կարևոր խնդիր է նաև այն, որ ցորենն այս տարի չի կարողացել ապահովագրել կարկուտից։
Այն մեր ցավոտ կողմն է։ Կարկուտի դեմ ապահովագրություն չկա։ Գոնե մարդ ապահովեր, որ ինչ-որ ցանել է, ինչ-որ պիտի ստանա, գոնե ապահովագրությամբ ստանա։ Եղել է, որ դաշտերս վնասվել են, բայց համապատասխան ստացել ենք, էլի ինչ-որ բալանսը պաշտպանվել է։ Կարտոֆիլի ապահովագրություն կա, բայց էդ պետք չէ։ Կարկուտը, եթե կարտոֆիլին խփի, կարելի է վերականգնել, բայց ցորենը չես կարող վերականգնել։
Կարկտի ռիսկից ապահովագրումը կարևոր է հատկապես լեռնային շրջանների համար։ Շիրակի մարզպետարանի գյուղվարչության պետ Ռոման Համայակյանն ինքն էլ գյուղատնտես է, ինքն էլ ցորեն ունի։ Ապահովագրական գործընթացը նաև վերաապահովագրողով էր պայմանավորված: Դրա պատճառով որոշակի փոփոխություններ է տեղի ունեցել ապահովագրության ծրագրում։ 2025 թվականին ներառվել է միայն «երաշտ ռիսկից» ապահովագրությունը հացահատիկային մշակաբույսերի համար։ Աշխատանքներ տարվում են, որպեսզի նոր մշակաբույսեր, նոր ռիսկեր ներգրավվեն և ծրագրը ավելի լավը դարձնելու ուղղությամբ աշխատանքներ իրականացվեն։
Հացահատիկային մշակաբույսերի ցանքատարածություններն այս տարի Շիրակում ավելացել են նախնական տվյալներով` շուրջ 30 տոկոսով։ Կառավարության կողմից ընդունվել էր բուսաբուծության աջակցության ծրագիր, համաձայն որի՝ գարնանացան հացահատիկային, կերային և հատիկ ընդեղեն մշակաբույսերով ցանք իրականացնող ֆերմերային տնտեսությունները հնարավորություն ունեն ստանալ փոխհատուցում ծախսերի մասնակի փոխհատուցում։ Այն իր մեջ ներառում է վարը, ցանքը, սերմի արժեքը 50 տոկոսի չափով փոխհատուցվում է հացահատիկային մշակաբույսերի դեպքում 70,000 դրամի չափով, ընդդեղեն մշակաբույսերի դեպքում` 100,000 և կերային մշակաբույսերի դեպքում` 110,000 դրամի չափով։