Հայաստանը պատմության մեջ առաջին անգամ մեդալ է նվաճել պարադահուկավազքի մրցաշարում
Հայաստանը ներկայացնող պարադահուկավազորդ Գարիկ Մելքոնյանը պատմության մեջ առաջին անգամ բրոնզե մեդալ է նվաճել Նորվեգիայում անցկացվող միջազգային վարկանիշային մրցաշարում։ Նա հաղթահարել է 10 կմ դասական ոճ մրցատարածությունը և երրորդ հորիզոնականը զբաղեցրել։
AMNEWS-ի հետ զրույցի ժամանակ Հայաստանի դահուկային սպորտի ֆեդերացիայի նախագահ Գագիկ Սարգսյանը նշեց, որ որքան սպասելի էր, այնքան էլ անսպասելի էր իրենց համար այս նվաճումը։
Տեսեք՝ կան տարբեր դասակարգումներ՝ ըստ հաշմանդամության․ նստած, կանգնած, թևը կամ ոտքը ամբողջությամբ կամ մասնակի ամպուտացված և այլն։ Մենք ունեցել ենք Հայաստանից մասնակիցներ նստած, այսինքն՝ ոտքերի ամպուտացմամբ և մեկ ոտքի մասնակի ամպուտացմամբ, բայց կանգնած մենք երբևէ չենք ունեցել այս դասակարգման մեջ։ Ընդհանրապես, Հայաստանը պարադահուկավազքից առաջին անգամ է մեդալ բերում։
Առաջիկայում Գարիկ Մելքոնյանն իր մարզումները կշարունակի Աշոցքում՝ պատրաստվելով հունվարին կայանալիք համաշխարհային ուսանողական ձմեռային խաղերին։ Ի դեպ, հաշմանդամային դահուկային մարզաձևերը առաջին անգամ են ընդգրկված լինելու ուսանողական խաղերում, և Գարիկը ներկայացնելու է Հայաստանը։ Փետրվար-մարտ ամիսներին Նորվեգիայում սպասվում են աշխարհի գավաթի և աշխարհի առաջնության խաղերը։
Նշենք, որ սա դեռ նախապատրաստական շրջանն է 2026 թվականին Իտալիայում կայանալիք ձմեռային օլիմպիական խաղերին ընդառաջ։
Այս պահին միայն Գարիկ Մելքոնյանն է Հայաստանը ներկայացնում, սակայն եթե կան մարզիկներ, որոնք ունեն համապատասխան ֆունկցիոնալ և ֆիզիկական պատրաստություն և կարող են մասնակցել նման մրցաշարերի, բնականաբար, հնարավորինս ամեն ինչ կանենք, որպեսզի մասնակցեն։
Սարգսյանը հավելում է, որ իրենք ոչ մի ֆինանսավորում չեն ստանում, և ըստ նրա՝ 2025 թվականին էլ նախատեսված չէ, ինչը ցավալի է։