Իրանի տարածքից արձակված ԱԹՍ-ները հարվածել են Նախիջևանին
Ադրբեջանի արտաքին գործերի նախարարությունը հայտարարել է, որ Իրանի տարածքից արձակված անօդաչու թռչող սարքեր են ընկել Նախիջևանի տարբեր հատվածներում։
Նախնական տեղեկությունների համաձայն՝ անօդաչու սարքերից մեկն ընկել է Նախիջևանի օդանավակայանի տերմինալներից մեկի տարածքում, ևս մի քանի ԱԹՍ՝ քաղաքի այլ հատվածներում։ Մեկ այլ անօդաչու սարք էլ ընկել է քաղաքի դպրոցներից մեկի հարակից տարածքում։
Միջադեպի հետևանքով երկու մարդ վիրավորվել է։
Ադրբեջանի արտաքին գործերի նախարարությունը խստորեն դատապարտել է Իրանի տարածքից իրականացված ԱԹՍ-ների հարձակումները։ Գերատեսչությունը նաև հայտնել է, որ Ադրբեջանում Իրանի դեսպանը կանչվել է ԱԳՆ՝ տեղի ունեցածի կապակցությամբ պարզաբանումներ ներկայացնելու համար։
Միջադեպի վերաբերյալ լրացուցիչ մանրամասներ դեռևս չեն հաղորդվում։
