Ամուլսարի ոսկու հանքը կշահագործվի 2025 թվականին
2025 թվականի չորրորդ եռամսյակում կմեկնարկի Ամուլսարի ոսկու հանքի շահագործումը: Արդյունքում կստեղծվի շուրջ 5 000 աշխատատեղ: Այս մասին հայտնել է «Լիդիան Արմենիա» ընկերության գործադիր տնօրեն Հայկ Ալոյանը՝ էկոնոմիկայի նախարար Վահան Պապոյանի հետ համատեղ մամուլի ասուլիսի ժամանակ։ Ամուլսարի ոսկու հանքի շահագործման իրավունքը տրամադրվել էր «Լիդիան Արմենիա» ընկերությանը՝ իրավական և տնտեսական հիմնավորումներով։ Վերջերս՝ դեկտեմբերի 27-ին, ընկերությունը իր բաժտեմասերի 12․5 տոկոսը նվիրել էր կառավարությանը։
Ըստ Ալոյանի՝ հանքի շահագործման աշխատանքների 70-80%-ն արդեն ավարտված է։ Շահագործման նախապատրաստման համար անհրաժեշտ է մոտ 250 մլն դոլար, որից 100 մլն դոլարը արդեն հավաքագրվել է, իսկ մնացած 150 մլն դոլարը նախատեսվում է հավաքել հայաստանյան բանկերից։
Ընկերությունը հայտարարել է, որ հանքավայրում շուրջ 70 տոննա ոսկու պաշարներ կան։ Նախնական տվյալներով՝ Ամուլսարի հանքավայրը տարեկան կարտադրի մոտ 210 հազար ունցիա ոսկի, որի ընդհանուր եկամուտը համաշխարհային ներկայիս գներով կհասնի 500 միլիոն դոլարի։ Ըստ այդմ՝ հանքավայրի նախնական շահագործումը նախատեսված է 12 տարվա համար, սակայն, հաշվի առնելով կանխատեսվող պաշարները, կարելի է խոսել 25 տարվա մասին։
Հանքավայրի շահագործման խնդիրը արդիական է շուրջ 10 տարի։ 2018 թվականին մի խումբ բնապահպաններ դիմել էին դատարան՝ հանքի շահագործումը կանխելու համար։ Մամուլի ասուլիսի ժամանակ Պապոյանը ընդգծել է, որ կառավարության աջակցությունը ծրագրին հաստատում է, որ բոլոր ռիսկերը կա՛մ չեզոքացվել են, կա՛մ կառավարելի են։
Սակայն բնապահպանները նշում են, որ հանքի շահագործումը կարող է վնաս հասցնել Հայաստանի ջրային ռեսուրսներին, մասնավորապես՝ Սևանա լճին, քանի որ Ամուլսարի հանքի տարածքում ստորերկրյա ջրերը փոխկապակցված են լճին։ Հանքի շահագործման արդյունքում հնարավոր է թունավոր նյութերի կամ ծանր մետաղների արտահոսք ստորերկրյա ջրեր։