Ատոմակայան կառուցելու ճանապարհին. Հայաստանը գնահատում է աշխարհի առաջատար երկրների առաջարկները
Հայաստանում նոր միջուկային էներգաբլոկի կառուցման նախապատրաստական աշխատանքները շարունակվում են։ Այս պահին տարբեր մոդելների ու տեխնոլոգիաների ուսումնասիրություններ են ընթանում՝ նպատակ ունենալով ընտրել այն տարբերակը, որը առավել համահունչ կլինի Հայաստանի էներգահամակարգին։ Սրա մասին խորհրդարանական հանձնաժողովների համատեղ նիստում հայտարարեց տարածքային կառավարման և ենթակառուցվածքների նախարար Դավիթ Խուդաթյանը։
Նրա խոսքով՝ հատկապես ուշադրության կենտրոնում են մոդուլային ռեակտորները։ Դրանք վերջին տարիներին տարածում են գտնում աշխարհում։ Այս ուղղությամբ իրականացվում են տեխնիկատնտեսական գնահատումներ՝ ներառյալ միջազգային գործընկերների հետ քննարկումներ։
Խուդաթյանը հիշեցրեց, որ դեռ 2023 թվականին հիմնվել է «Ատոմային նոր էներգաբլոկի կառուցում» ՓԲԸ-ն։ Այն ներկայում անցնում է կադրային համալրման փուլ։ Նախարարությունը դիտարկում է մի շարք երկրներից ստացված առաջարկներ։ Բացի Ռուսաստանի և ԱՄՆ-ի նախաձեռնություններից՝ քննարկումներ են ընթանում նաև Չինաստանի և Կորեայի հետ։ Ըստ նախկինում տրամադրված տեղեկությունների՝ ամերիկյան ընկերությունն արդեն սկսել է տեխնիկատնտեսական ուսումնասիրություն փոքր մոդուլային ատոմակայանի կառուցման նպատակահարմարության վերաբերյալ։
Հիշեցնենք, որ մոդուլային ատոմակայանի գաղափարը Հայաստանի կառավարությունում ակտիվորեն շրջանառվում է 2023 թվականից։ Վարչապետ Նիկոլ Փաշինյանը ավելի վաղ նշել էր, որ մոդուլային տեխնոլոգիան կարող է լինել Հայաստանի ապագա էներգետիկ անվտանգության առանցքային բաղադրիչներից։ Նախկինում քննարկվել էր ռուսական ВВЭР-1200 մոդելի կիրառումը, որը հաջողությամբ շահագործվում է նաև Բելառուսում։ Դիտարկվել էր նաև ամերիկյան փոքր մոդուլային ռեակտորների՝ SMR-ների հնարավորությունը, որոնք համարվում են համեմատաբար արագ կառուցվող և ճկուն տարբերակ։