Ռուսաստանից Հայաստան ներկրվող 190 ցլիկների խմբաքանակի փաստաթղթերը կեղծված են եղել․ նրանք մնացել են Գոգավանի անցակետում
Սննդամթերքի անվտանգության տեսչական մարմինն անդրադարձել է մամուլում տարածված լուրերին՝ կապված Գոգավանի անցակետում 10 օր կանգնած մնացած բեռնատարների հետ, որոնք բեռնված են 190 ցլիկներով: ՍԱՏՄ մամուլի քարտուղար Անուշ Հարությունյանի փոխանցմամբ՝ կենդանիների ուղեկցող փաստաթղթերը կեղծված են եղել:
Հարևան երկրներում կան դաբաղի բռնկումներ, և ՍԱՏՄ-ն պարտավոր է ստուգել բոլոր կենդանիների ուղեկցող փաստաթղթերը, որպեսզի հասկանա, թե այդ կենդանիները որտեղից են բերվում: Խմբաքանակը բերվել է Ռուսաստանի Դաշնությունից, և մենք արդեն այնտեղի համապատասխան կառույցից ճշտել ենք, որ կենդանիներին ուղեկցող փաստաթղթերը իրենց կողմից տրված չեն և կեղծված են: Սա նշանակում է, որ խմբաքանակը անհայտ ծագման է, իսկ անհայտ ծագման կենդանիները ենթակա են կա՛մ վերադարձի, կա՛մ ոչնչացման։
Հիշեցնենք, որ արդեն 2 օր է մամուլում տեղեկություններ են տարածվում Գոգավանի անցակետում մնացած 2 բեռնատարների մասին։ Ներմուծող ընկերությունից հայտնել են, որ նրանց ո՛չ թողնում են մուտք գործել Հայաստան, ո՛չ էլ հետ գնալ Ռուսաստան։