Ծառայողական մեքենաների թիվը կհասնի մինիմումի․ Փաշինյան
Կառավարության որոշմամբ պետական 52 մարմնից կվերցվի 423 միավոր տրանսպորտային միջոց, որոնք կամրակցվեն պետական գույքի կառավարման կոմիտեին։ Միաժամանակ նախատեսվում է որոշումը ուժի մեջ մտնելուց հետո 4 ամսվա ընթացքում հանձնման-ընդունման գործընթացը ավարտել։ Առգրավված տրանսպորտային միջոցները տեղափոխվելու են Երևանի Մալաթիա-Սեբաստիա վարչական շրջան։ Դրանց մեծ մասը վաճառվելու է։
Հանձնում-ընդունումից հետո ավտոմեքենաները մեզ մոտ պահառության կընդունվեն։ Դրանց մի մասը, որոնք թարմ են, նոր են, և պետական համակարգում ավելի հին մեքենաների փոխարինման անհրաժեշտություն կլինի, կփոխարինենք։ Բայց մեծամասնությունը, վստահաբար, աճուրդային եղանակով վաճառվելու է։ Այս տարվանից գործում է նաև էլեկտրոնային աճուրդների համակարգը։ Այդ համակարգով քաղաքացիները կարող են մասնակցել աճուրդներին և ձեռք բերել մեքենաները, ինչպես նաև անշարժ և շարժական այլ գույք, — հայտարարել է Տարածքային կառավարման և ենթակառուցվածքների նախարարության պետական գույքի կառավարման կոմիտեի նախագահ Առնակ Ավետիսյանը։
Տարածքային և ենթակառուցվածքների նախարար Դավիթ Խուդաթյանը հավելել է, որ համանման գործընթանցեր են ընթանում նաև համայնքներում։ Նախատեսվում է 50 և ավելի տոկոսով կրճատել համայնքային տրանսպորտային միջոցները։
Հիշեցնենք, որ նախօրեին վարչապետը հայտարարել էր ծառայողական մեքենաների 70-90 տոկոս կրճատման մասին։