Երևանը փոխանցել է հրադադարի խախտումների վերաբերյալ հետաքննության տվյալները
Հայաստանը հետաքննություն է իրականացրել Ադրբեջանի կողմից հայտարարված հրադադարի խախտումների վերաբերյալ և արդյունքները փոխանցել է ադրբեջանական կողմին։ Հետաքննության արդյունքում պարզվել է, որ նման խախտումներ, ըստ Հայաստանի տվյալների, չեն արձանագրվել։
Տեղեկությունը հայտնել է Անվտանգության խորհրդի քարտուղարը՝ մայիսի 9-ին լրագրողների հետ ճեպազրույցի ժամանակ։ Նրա խոսքով, Հայաստանը նախապես դիվանագիտական ուղիներով դիմել էր Ադրբեջանին՝ խնդրելով տրամադրել տվյալներ այն խախտումների վերաբերյալ, որոնց մասին պարբերաբար հայտարարում է Բաքուն։ Ստացված տեղեկատվության հիման վրա հայկական կողմը կատարել է ուսումնասիրություն և արձանագրել, որ այդ խախտումները չեն համապատասխանում իրականությանը։
Հայաստանը նդրել է դիվանագիտական ճանապարհով տվյալներ տրամարդել խախտումների վերաբերյալ, որոնց մասին Ադրբեջանը հայտարարում է։ Հետաքննություն է կատարվել և դրանք փոխանցվել է Ադրբեջանին՝ բոլոր միջադեպերի վերաբերյալ, — նշել է Արմեն Գրիգորյանը։
Նա ընդգծել է նաև, որ Հայաստանը ևս Ադրբեջանին է փոխանցել իր կողմից արձանագրված խախտումների վերաբերյալ տվյալներ և ակնկալում է դրանց վերաբերյալ պատշաճ հետաքննություն։
Հիշեցնենք, որ վերջին շաբաթների ընթացքում Սյունիքի և Տավուշի մարզերի մի շարք սահմանային համայնքներում պարբերաբար կրակոցներ են արձանագրվում։ Հայկական կողմը նախկինում առաջարկել է հրադադարի ռեժիմի խախտումների վերաբերյալ ստեղծել համատեղ հետաքննության մեխանիզմ, սակայն ադրբեջանական կողմը դեռ չի արձագանքել այդ առաջարկին։