Կանայք արտոնություններ կստանան պարեկային ծառայությունում աշխատանքի ընդունվելու համար
ՀՀ ներքին գործերի նախարար Արփինե Սարգսյանը հայտարարել է, որ այսուհետ պարեկային ծառայությունում թափուր հաստիքների համար նախատեսված 30 տոկոսանոց քվոտան կանանց համար պետք է պարտադիր լրացվի, առանց որևէ զիջման։
Այս մասին նախարարը հայտնել է ապրիլի 16-ին Ազգային ժողովում՝ Կառավարության 2021-2026 թթ. ծրագրի 2024 թվականի կատարման ընթացքի վերաբերյալ քննարկումների ժամանակ՝ պատասխանելով կանանց ներգրավվածության մասին հարցին:
Ճիշտ է, պրակտիկայում որոշակի շեղումներ ունենում ենք առ այն, որ 30 տոկոսը չի համալրվում կանանցով, հետևաբար, որոշակի տոկոսայնություն կրկին տրամադրվում է տղամարդ դիմորդներին, բայց այսուհետ որոշել ենք այլևս չանել այդ զիջումը, որովհետև թափուր հաստիքները պիտի համալրեն հենց կին ծառայողները, որպեսզի սեռերի հավասար ներկայացվածության կոմպոնենտը կարողանանք հետևողականորեն իրականացնել, այլ ոչ թե անընդհատ գնանք հաստիք ավելացնելու ճանապարհով, — նշել է նախարարը։
Նախարարը տեղեկացրել է, որ իրականացված երկու նպատակային ընդունելությունների արդյունքում այսօր Հայաստանի բոլոր մարզերում առնվազն մեկ կին պարեկ ծառայություն է իրականացնում։ Վերջին ընդունելության արդյունքում լրացվել է նաև Վայոց ձորի մարզում առկա թափուր պաշտոնը։
Սարգսյանը նշել է նաև, որ առաջիկայում նախատեսվում է չեղարկել կանանց՝ պարեկային ծառայության մեջ ընդունվելու համար սահմանված 35 տարվա վերին տարիքային շեմը։
Տարիքը չենք հանում միայն հանելու համար, այլ կարևորն այն է, որ կադրերին ընտրում ենք հաշվի առնելով որակական տարբեր, այդ թվում ֆիզիկական տվյալները։ Հետևաբար, ֆիլտրը լինելու է այս բոլոր բաղադրիչները հաշվի առնելով։ Եթե անձը 3, 38 կամ 40 տարեկան է, ոչ մի բան չի խանգարում ծառայության անցնելու ոստիկանությունում
Օրենսդրական փոփոխությունն ակնկալվում է ընդունել մինչև Ազգային ժողովի ամառային արձակուրդները։ Նոր ընդունելությունը նախատեսվում է այս աշնանը։ Դիմելու նվազագույն տարիքային շեմը կմնա 18 տարին։
