Ծխախոտի տուփերի վրա նախազգուշացնող պատկերներ չտպելու տուգանքը կխստացվի
Ծխախոտային արտադրանքի տուփերի վրա նախազգուշացնող գրաֆիկական պատկերներ չտպելու համար սահմանված տուգանքը կբարձրանա։ Այս մասին մայիսի 7-ին Ազգային ժողովում հայտարարեց ՀՀ էկոնոմիկայի նախարար Գևորգ Պապոյանը՝ ներկայացնելով համապատասխան օրենսդրական փոփոխության նախագիծը։ Նախագծով առաջարկվում է 400 հազար դրամ ֆիքսված տուգանքի փոխարեն սահմանել տուգանք՝ խախտողի նախորդ տարվա հասույթի 1 տոկոսի չափով։ Նախարարի խոսքով՝ սա խթան կլինի տնտեսվարողներին վերադառնալ օրինական դաշտ։
2024 թվականի հունվարի 1-ից ԵԱՏՄ նոր կանոնակարգով սահմանվել է, որ ծխախոտի տուփերի վրա պարտադիր պետք է լինեն ծխելու վնասների մասին զգուշացնող պատկերներ։ Սակայն, ըստ նախարարի, մի շարք ընկերություններ հրաժարվել են հետևել այս պահանջին՝ նախընտրելով վճարել 400 հազար դրամ տուգանքն ու շարունակել առանց համապատասխան պատկերների արտադրությունը։
Կային դեպքեր, որ ընկերություններն ասում էին, դե ունենք նախկինից մնացած քանակ, պետք է փորձենք սպառել, դրանից հետո կանցնենք նոր տպագրությանը։ Կային դեպքեր, որ ասում էին, որ մենք խախտում ենք, կվճարենք 400 հազար տուգանքը և կշարունակենք նորից վաճառել։ Շուկայում այնպիսի իրավիճակ էր ստեղծվել, որ որոշ ընկերություններ չէին տպագրում այդ գրաֆիկական պատկերները և շարունակում էին մի վարքագիծ, որը առողջապահական տեսանկյունից շատ վտանգավոր է, հանրության նկատմամբ անհարգալից վերաբերմունք է, սպառողների իրավունքների պաշտպանության համար և մրցակցության առումով մեծ խնդիրներ է առաջացնում։ Եթե օրինակ, պայմանական, շուկայում կա 10 մասնակից, որոնցից 8-ը հետևում են օրենքին, իսկ մյուս 2-ը արհամարում են օրենքը, բնականաբար վերջիններս մրցակցային առավելություն են ստանում մյուս բարեխիղճ տնտեսվարողների նկատմամբ, — ընդգծել է Պապոյանը։
Հարակից զեկուցող Բաբկեն Թունյանը տեղեկացրեց, որ ուսումնասիրությունները ցույց են տվել՝ առավելություն են ստացել այն ընկերությունները, որոնք չեն կատարել օրենքի պահանջը, իսկ մյուսները կորցրել են վաճառքի ծավալները։ Նա առաջարկեց նախագիծը երկրորդ ընթերցմամբ քննարկել 24 ժամվա ընթացքում՝ օրենքի շուտափույթ ընդունումն ապահովելու համար։
Հիշեցնենք, որ 2022 թվականի մարտի 15-ից արգելվել է ծխախոտի օգտագործումը փակ և կիսափակ հանրային վայրերում։ Բացի այդ՝ խանութներում արգելվում է ծխախոտային արտադրանքի բաց ցուցադրումը։ Դրանք պահվում են փակ պատուհաններում