Լեհաստանի նախագահը Երասխում հանդիպել է ԵՄ առաքելության լեհ դիտորդների հետ
Նոյեմբերի 25-27-ը պաշտոնական այցով Հայաստան ժամանած Լեհաստանի նախագահ Անջեյ Դուդան Երասխում հանդիպել է ԵՄ առաքելության լեհ դիտորդների հետ։
Հայաստանի Հանրապետությունում Եվրամիության առաքելության ղեկավարն է Մարկուս Ռիտերը, իսկ տեղակալը՝ ազգությամբ լեհ Մարեկ Կուբերսկին։ Առաքելությունը ստեղծվել է 2023 թվականի փետրվարին՝ երկու տարի ժամկետով, և դրա նպատակները ներառում են՝ իրավիճակի մոնիթորինգը և պարեկությունը Հայաստանի և Ադրբեջանի սահմանին,- գրել է նախագահը X-ի իր միկրոբլոգում։
Երկօրյա այցով Հայաստան եկած նախագահը հանդիպել է մի շարք բարձրաստիճան պաշտոնյաների հետ։ Քննարկվել են մի շարք հարցեր։ Անդրադարձ է կատարվել հայ-ադրբեջանական հարաբերություններին։ Կարևորվել է երկու երկրների միջև խաղաղության հաստատումը։
Առանձին հանդիպումներում շեշտվել է նաև Հայաստանի և Լեհաստանի միջև տնտեսական և մշակութային համագործակցությունների կարևորությունը։ Կողմերը մտքեր են փոխանակել երկուստեք հետաքրքրություն ներկայացնող հարցերի շուրջ, ներառյալ կրթության և տեխնոլոգիաների ոլորտում համագործակցությունը։
Հայաստանի և Լեհաստանի միջև դիվանագիտական հարաբերություններ են հաստատվել 1992 թվականից։ Երկու երկրների միջև գործում է 9 միջազգային պայմանագիր, ինչպես նաև առկա են իրավաբանական պարտադիր ուժ չունեցող միջազգային բնույթի մի շարք այլ փաստաթղթեր։