Ընդդիմադիր պատգամավորները դիմել են դատարան
Ազգային ժողովի «Հայաստան» խմբակցության 4 պատգամավորները՝ Քրիստինե Վարդանյանը, Աննա Գրիգորյանը, Գեղամ Մանուկյանը և Արթուր Խաչատրյանը, դատական հայց են ներկայացրել կառավարության և ԱԳՆ-ի դեմ։ Նրանք պահանջել են ոչ իրավաչափ ճանաչել արտգործնախարար Արարատ Միրզոյանի 2024 թվականի մարտի 14-ի գրությունը, որի համաձայն արգելվել է վերը նշված պատգամավորներին ծանոթանալ խաղաղության պայմանագրի բովանդակությանը։
Նրանք պայմանագրի բովանադակությանը ծանոթացել են դեկտեմբերին։ Սակայն դրանից կարճ ժամանակ անց նրանց այդ հնարավորությունը սահմանափակվել է։
Էդ թղթերին ծանոթացել եք, հետո՝ սոցիալական ցանցերում իրականության հետ բացարձակ կապ չունեցող ինչ-որ գրառումներ եք արել, ձեր քաղաքական նպատակներով շահարկել։ Ես էլ արգելել եմ, որովհետև դուք գնաք տեքստը կարդաք ու դրա մասին հեքիաթներ պատմեք, մենք էլ սուսուփուս նստե՞նք, — հայտարարել էր Նիկոլ Փաշինյանը։
Դրան նախորդել էր «Հայաստան» խմբակցության անդամների հայտարարությունն այն մասին, որ «ադրբեջանական առաջարկներն ու մոտեցումները որևէ կերպ չեն արտահայտում իրական, արդար և հարատև խաղաղություն հաստատելու ցանկություն ունեցող երկրի դիրքորոշումը»։
Նախնական դատական նիստը նշանակվել է 2025 թվականի հունվարի 14-ին։