Բաքվում շարունակվել է Արցախի նախկին ղեկավարների դատավարությունը
Հունվարի 27-ին Բաքվում շարունակվել է Արցախի նախկին ղեկավարների դատավարությունը։ Դատարանը մերժել է պաշտպանների միջնորդությունը՝ նախկին ղեկավարների կալանքը տնային կալանքով փոխարինելու վերաբերյալ։ Նրանք մերժել են նաև Ռուբեն Վարդանյանի փաստաբանի միջնորդությունը` գործի նյութերին ծանոթանալու համար լրացուցիչ 30 օր տրամադրելու մասին։
Նախորդ դատական նիստի ժամանակ բազմաթիվ շինծու հանցագործությունների մեջ մեղադրվող Արայիկ Հարությունյանը հայտնել է, որ առողջական խնդիրներ չունի։ Նիստում ղեկավարների պաշտպանների մեծ մասը միջնորդություններ է ներկայացրել խափանման միջոց կալանքը տնային կալանքով փոխարինելու վերաբերյալ: Սակայն, ի տարբերություն մյուսների, Հարությունյանն ու նրա փաստաբանը տնային կալանքի տեղափոխման պահանջ չեն ներկայացրել։
Դատախազը դեմ է արտահայտվել այս միջնորդություններին՝ վկայակոչելով ամբաստանյալների բնութագրերը, մեղադրանքի ծանրությունն ու բնույթը, ինչպես նաև այն ռիսկը, որ խափանման միջոցը փոխելը կարող է խոչընդոտել դատական գործընթացի անաչառությանը:
Հունվարի 27-ին նաև կայացել է Ռուբեն Վարդանյանի երկրորդ դատավարությունը։ Ավելի վաղ նա իր ընտանիքի անդամների միջոցով հայտարարել էր, որ իրեն շուրջ 42 մեղադրանք է առաջադրվել, որոնցից մի քանիսով նախատեսվում է ցմահ ազատազրկում։ Նա նաև հայտնել է, որ իր ստորագրությամբ կեղծ արձանագրություններ են կազմվել, որոնք չեն համապատասխանում իրականությանը։
Հիշեցնենք, որ Ադրբեջանն ապօրինի ձերբակալել և շինծու մեղադրանքներ է առաջադրել Լեռնային Ղարաբաղի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին, Լեռնային Ղարաբաղի Ազգային ժողովի պաշտոնը զբաղեցրած Դավիթ Իշխանյանին, արտաքին գործերի նախկին նախարար Դավիթ Բաբայանին, Պաշտպանության նախկին նախարար Լևոն Մնացականյանին, Պաշտպանության նախարարի նախկին տեղակալ Դավիթ Մանուկյանին, նախկին պետնախարար Ռուբեն Վարդանյանին։
Կեղծ մեղադրանքներ են առաջադրվել նաև Վասիլի Բեգլարյանին, Էրիկ Ղազարյանին, Դավիթ Ալահվերդյանին, Գուրգեն Ստեփանյանին, Լևոն Բալայանին, Մադաթ Բաբայանին, Գարիկ Մարտիրոսյանին, Մելիքսեթ Փաշայանին։