Հայտնի են Փարաքարի ընտրությունների մասնակից դաշինքների համարները

Կենտրոնական ընտրական հանձնաժողովը մարտի 11-ի հերթական նիստում մարտի 30-ին նշանակված ՏԻՄ ընտրություններին մասնակցող կուսակցություններին, կուսակցությունների դաշինքներին հերթական համարներ տրամադրելու համար իրականացրել է վիճակահանություններ։

Դրանք իրականացվել են յուրաքանչյուր համայնքի ավագանու ընտրություններին մասնակցող կուսակցությունների, կուսակցությունների դաշինքների միջև առանձին՝ մեկնարկելով Փարաքար համայնքից, որտեղ առաջադրված կուսակցությունների և կուսակցությունների դաշինքների թիվը ամենափոքրն է։

Այսպիսով Փարաքար համայնքի ՏԻՄ ընտրություններին մասնակցող ուժերը վիճակահանության արդյունքում ստացել են հետևյալ հերթական համարները՝

«Քաղաքացիական պայմանագիր» կուսակցություն — 1

Լյուդվիդ Գյուլնազարյան,

Կարապետ Արթենյան,

Արաքսյա Վարդանյան։

Լյուդվիգ Գյուլնազարյանը նախկինում եղել է Փարաքարի համայնքապետ։ Նա հրաժարական տվել Երևանում տեղի ունեցած սպանությունից հետո։ Ավելի ուշ նա հայտարարել էր, որ կապ չունի այդ դեպքի հետ և ոչ ճիշտ ժամին ոչ ճիշտ վայրում է հայտնվել։

Կարապետ Արթենյանը եղել է Փարաքար համայնքի ղեկավարի տեղակալ։

«Միասնություն» կուսակցությունների դաշինք — 2

Այս դաշինքի մեջ են մտնում «Ապրելու երկիր» և «Հաղթանակ» կուսակցությունները։

Վալոդյա Գրիգորյան,

Օնիկ Ախվերդյան,

Էմմա Թորոսյան։

Վոլոդյա Գրիգորյանը 2021 թվականի դեկտեմբերից Փարաքար համայնքի ավագանու անդամ է և Փարաքար համայնքի «Ապրելու Երկիր» խմբակցության ղեկավար։

«Ազգային առաջընթաց կուսակցություն» — 3

Դավիթ Մինասյան,

Մարինե Աբրահամյան,

Վարդան Ուզունյան։

Դավիթ Մինասյանը 2019 թվականի սեպտեմբերի 29-ից մինչև 2024 թվականի մայիսը Փարաքար համայնքի ղեկավարն է եղել։

«Կայունություն» կուսակցություն — 4

Գոռ Սարիբեկյան,

Էմին Երիցյան,

Արփենիկ Վարդանյան:

Գոռ Սարիբեկյանը և Կարապետ Արթենյանը նախկին գործընկերներ են։ Նրանք երկուսն էլ աշխատել են Փարաքարի համայնքապետարանում՝ որպես տեղակալներ։ Նա օրեր առաջ հերքել էր մամուլում տարածվող լուրերն այն մասին, որ սատարում է «Քաղաքացիական պայմանագիր» կուսակցության ներկայացուցիչներին և պատրաստ է միավորվել նրանց հետ։

Էմին Երիցյանը Հայաստանի համայնքների միության նախագահ։ Բացի այդ՝ նա մի շարք միջազգային կազմակերպություններում Հայաստանի ներկայացուցիչն է։

Փարաքարի ավագանու ընտրությունները տեղի կունենան մարտի 30-ին։